లతా మంగేష్కర్ కు అక్కినేని అవార్డు

హైదరాబాద్: ప్రముఖ హిందీ గాయని లతా మంగేష్కర్ కు రాష్ట్ర ప్రభుత్వం అక్కినేని నాగేశ్వర రావు అంతర్జాతీయ అవార్డును ప్రకటించింది. సినీ పరిశ్రమకు విశేష సేవ చేసిన సినీ ప్రముఖులకు ఈ అవార్డు ఇస్తారు. ఈ అవార్డు కింద నాలుగు లక్షల రూపాయల నగదు కూడా ఇస్తారు. ముఖ్యమంత్రి కె. రోశయ్య ఫిబ్రవరి 1వ తేదీన అవార్డును లతా మంగేష్కర్ కు ప్రదానం చేస్తారు.

హైదరాబాదులోని ఓ ప్రముఖ హోటల్లో లతా మంగేష్కర్ కు అవార్డు ప్రదానం జరుగుతుంది. లతా మంగేష్కర్ ఈ నెల 31వ తేదీన హైదరాబాదు చేరుకుంటారు. 85 ఏళ్లు నిండిన ఆమెకు అదే రోజు హైదరాబాదులో సన్మానం జరుగుతుంది. మర్నాడు ఆమెకు అక్కినేని నాగేశ్వర రావు అంతర్జాతీయ అవార్డు ప్రదానం జరుగుతుంది. లతా మంగేష్కర్ హిందీలోనే కాకుండా పలు భాషా చిత్రాల్లో ఎన్నో పాటలు పాడారు. ఒక తెలుగు చిత్రంలో కూడా ఆమె పాట పాడారు. ప్రముఖ తెలుగు సినీ నటుడు అక్కినేని నాగేశ్వర రావు పేర నెలకొల్పిన ఈ అవార్డును గతంలో సినీ ప్రముఖులు అందుకున్నారు.