రాజేంద్రనాథ్ రెడ్డిపై సబితా ఇంద్రారెడ్డి సీరియస్

హైదరాబాద్: బిసి నేత, మద్యం వ్యాపారి పలగాని ప్రభాకర్ కూతురు నాగవైష్ణవి హత్యకు సంబంధించి రాష్ట్ర హోం మంత్రి సబితా ఇంద్రారెడ్డి విజయవాడ పోలీసు కమిషనర్ రాజేంద్రనాథ్ రెడ్డిపై సీరియస్ అయ్యారు. పోలీసుల తీరుపై ఆమె మంగళవారం తీవ్ర ఆగ్రహం వ్యక్తం చేశారు. పోన్ చేసి ఆమె రాజేంద్రనాథ్ రెడ్డి నుంచి సంజాయిషీ అడిగారు. పోలీసులు పూర్తిగా అలసత్వం ప్రదర్శించారనే విమర్శలు వస్తున్నాయి.

పలగాని ప్రభాకర్ కు కుటుంబ తగాదాలున్నాయని మీడియా వార్తా కథనాలు ప్రచురించినా పట్టించుకోలేదని, మొత్తం వ్యాపార లావాదేవీలపైనే దృష్టి పెట్టి విచారణ జరిపారని, దీంతో నాగవైష్ణవిని కాపాడలేకపోయారని పోలీసులపై విమర్శలు వినిపిస్తున్నాయి. ఈ హత్యపై ముఖ్యమంత్రి రోశయ్య సమీక్ష జరపనున్నారు. ఈ హత్యలో దోషులు ఎంతటి పెద్దవారైనా వదిలి పెట్టేది లేదని ఆయన సోమవారం రాత్రే చెప్పారు. నాగవైష్ణవిని కాపాడలేకపోయామని సబితా ఇంద్రారెడ్డి విచారం వ్యక్తం చేశారు.