కమిటీకి కాల పరిమితి ఉండాలి: శ్రీధర్

హైదరాబాద్: రాష్ట్ర పరిస్థితిపై వేసిన జస్టిస్ శ్రీకృష్ణ కమిటీకి నిర్దిష్టమైన కాలపరిమితి పెట్టాలని, ఆ కాల పరిమితి 3 నెలల నుంచి 6 నెలల పాటు ఉండాలని తెలంగాణకు చెందిన రాష్ట్ర మంత్రులు కోమటిరెడ్డి వెంకటరెడ్డి, శ్రీధర్ బాబు అన్నారు. కాంగ్రెసు సీనియర్ నేత కే. కేశవరావు నివాసంలో పార్టీ తెలంగాణ నాయకుల సమావేశానంతరం వారు మీడియా ప్రతినిధులతో మాట్లాడారు. తెలంగాణ రాష్ట్ర ఏర్పాటుకు మాత్రమే శ్రీకృష్ణ కమిటీ వేశారని నమ్ముతున్నామని, తెలంగాణ రాష్ట్ర ఏర్పాటు ఖాయమని విశ్వసిస్తున్నామని వారన్నారు. తెలంగాణ రాష్ట్ర ఏర్పాటు ప్రక్రియ సరిగా జరగడానికి ఢిల్లీలో పార్టీ తెలంగాణ పార్లమెంటు సభ్యులు పని చేయాలని వారు అభిప్రాయపడ్డారు.

మంత్రులుగా తాము ప్రభుత్వం నుంచి తెలంగాణకు అన్యాయం జరగకుండా చూస్తామని వారు చెప్పారు. కొత్త నియామకాలు చేపట్టకుండా, చేపట్టినా తెలంగాణకు అన్యాయం జరగకుండా చూస్తామని వారు చెప్పారు. తెలంగాణకు బడ్జెట్ లో తగిన కేటాయింపులు జరిగేలా చూస్తామని వారన్నారు. ఎట్టి పరిస్థితిలోనూ తెలంగాణ రాష్ట్ర ఏర్పాటు విషయంలో తాము రాజీ పడబోమని వారన్నారు. పిసిసి సమన్వయ కమిటీ చైర్మన్ గా వీరప్ప మొయిలీ కాకుండా డి. శ్రీనివాస్ ఉండాలని వారన్నారు. జస్టిస్ శ్రీకృష్ణ కమిటీపై ప్రజలకు అపోహలు వద్దని ఆయన అన్నారు.