ఆ అధికారి ఆస్తులు 30 కోట్ల దాకా

హైదరాబాద్: ఆ అధికారి కోట్లకు పడగలెత్తారు. ప్లాట్ల మీద ప్లాట్లు కొన్నారు. అవినీతి నిరోధక శాఖ (ఎసిబి) అధికారులు సోదాలు నిర్వహిస్తే అతని అస్తుల బండారం బయటపడింది. అతనెవరో కాదు, చట్టాలు చేసే శాసనసభలో ఉన్నతాధికారి. శాసనసభ ప్రత్యేక కార్యదర్శి కోలేటి గోపాలకృష్ణ నివాసాల్లో, ఆయన బంధువుల నివాసాల్లో ఎసిబి అధికారులు గురువారం ఉదయం సోదాలు ప్రారంభించారు. హైదరాబాదు, నెల్లూరు, తిరుపతిల్లో ఏకకాలంలో సోదాలు నిర్వహిస్తున్నారు. ఈ సోదాల్లో ఇప్పటి వరకు 20 కోట్ల రూపాయల ఆస్తులు బయటపడినట్లు సమాచారం. మరో పది కోట్ల రూపాయల వరకు బయటపడే అవకాశం ఉందని ఎసిబి అధికారులు చెబుతున్నారు.

ఇప్పటి వరకు ఎసిబి నిర్వహించిన సోదాల్లో - 33 ప్లాట్లు, మూడు కిలోల బంగారం, 20 కిలోల వెండి, 13 లక్షల రూపాయల నగదు బయటపడ్డాయి. రెండు బ్యాంకు లాకర్లు కూడా ఉన్నట్లు తేలింది. హైదరాబాదులోని బంజారాహిల్స్, రెడ్ హిల్స్, శ్రీనగర్ కాలనీల్లో ఆయన, ఆయన బంధువుల ఇళ్లలో అధికారులు సోదాలు నిర్వహించి విలువైన డ్యాక్యుమెంట్లను కూడా స్వాధీనం చేసుకున్నారు. ఆయనగారికి ఓ కారు కూడా ఉంది. హైదరాబాద్ సమీపంలోని షేక్ పేటలో జిప్లస్ - 3 భవనం నిర్మాణంలో ఉంది. కృష్ణా జిల్లాలో 16 ఎకరాల భూమి బయటపడింది. వేయి అమెరికన్ డాలర్లు కూడా ఉన్నాయి. అక్రమ కలప వ్యాపారానికి సంబంధించిన ఆరోపణలు రావపడంతో ఎసిబి అధికారులు గోపాలకృష్ణ ఆస్తుల వివరాల కోసం సోదాలు నిర్వహించారు.