మంత్రులపై రోశయ్య మండిపాటు

హైదరాబాద్: కాంగ్రెసు నేతలు, మంత్రులు, శాసనసభ్యులపై ముఖ్యమంత్రి కె. రోశయ్య తీవ్రంగా మండిపడ్డారు. గతంలో ఎన్నడూ లేనివిధంగా ఆయన సహనం కోల్పోయి ఆగ్రహం వ్యక్తం చేశారు. ఎవరి ఇష్టప్రకారం వారు వ్యవహరిస్తే ఎలా అని ఆయన ప్రశ్నించారు. కాంగ్రెసు సీనియర్ శాసనసభ్యుడు తనపై, ప్రభుత్వంపై చేస్తున్న విమర్సలపై కూడా ఆయన తీవ్రంగా ప్రతిస్పందించారు. దామోదర్ రెడ్డి అలా మాట్లాడుతుంటే తిప్పికొట్టాల్సిన బాధ్యత మంత్రులపై లేదా అని ఆయన అడిగారు. శాసనసభా సమావేశాలు సజావుగా సాగడానికి ఆయన గత కొద్ది రోజులుగా మంత్రులతో గ్రూపులవారీగా సమావేశమవుతున్నారు. బుధవారం జరిగిన మంత్రుల సమావేశంలో ఆయన తన కోపాన్నంతా వ్యక్తం చేశారు.

దామోదర్ రెడ్డి తనపై, ప్రభుత్వంపై తీవ్ర వ్యాఖ్యలు చేస్తుంటే ఎవరూ మాట్లాడకపోవడమేమిటని ఆయన అడిగారు. సమావేశంలో ఉన్న మంత్రి డికె అరుణను ప్రత్యేకంగా ప్రశ్నించారు. తాను దామోదర్ రెడ్డి వ్యాఖ్యలు వినలేదని అరుణ ముఖ్యమంత్రితో చెప్పినట్లు సమాచారం. మంత్రులు బాధ్యతగా వ్యవహరిస్తూ సమిష్టిగా పనిచేయాలని ఆయన సూచించారు. ముఖ్యమంత్రి ఆగ్రహం దాంతో ఆగిపోలేదు. నిజామాబాద్ సమీక్ష సమావేశంలో ఆయన ఏకంగా అలిగారు. బుధవారం జరిగిన నిజామాబాద్ సమీక్షా సమావేశంలో జై తెలంగాణ నినాదాలు చేయడంపై ఆయన అలక బూనారు. తాను జై ఆంధ్ర, తెలంగాణ నినాదాలు వినడానికి రాలేదని ఆయన చెప్పారు. ఆ నినాదాలకు అలిగి ఆయన చేంబర్ లోకి వెళ్లిపోయారు. మంత్రి శ్రీధర బాబు, ఉన్నతాధికారులు ఆయన వెంట వెళ్లి బతిమాలారు. అరగంట తర్వాత అలక వీడి ఆయన వెనక్కి వచ్చారు.