తెలంగాణపై ఢిల్లీలో జెఎన్ యు విద్యార్థుల అరెస్టు

న్యూఢిల్లీ: తెలంగాణ అంశంపై ధర్నాకు దిగిన జవహర్ లాల్ నెహ్రూ విశ్వవిద్యాలయం (జెఎన్ యు) విద్యార్థులను శనివారం పోలీసులు ఢిల్లీలో అరెస్టు చేశారు. శ్రీకృష్ణ కమిటీ సమావేశం జరుగుతున్న విజ్ఞాన్ భవన్ వద్ద జెఎన్ యు విద్యార్థులు ధర్నాకు దిగారు. తెలంగాణకు అనుకూలంగా నినాదాలు చేశారు. కమిటీ గోబ్యాక్ అంటూ కూడా నినాదాలు చేశారు. కమిటీ విధివిధానాలు తెలంగాణకు వ్యతిరేకంగా ఉన్నాయంటూ వారు విమర్శలు చేశారు. దీంతో పోలీసులు వారిని అరెస్టు చేశారు.

తెలంగాణ తమ జీవన్మరణ సమస్య అని సునీత అనే విద్యార్థిని అన్నారు. చట్టబద్దంగా తాము ప్రజాస్వామ్య పద్థతిలో నిరసన వ్యక్తం చేస్తుంటే తమను పోలీసులు అరెస్టు చేశారని ఆమె విమర్శించారు. రాజకీయ పార్టీలకు అతీతంగా రాజకీయ నాయకులందరూ తెలంగాణ కోసం ముందుకు రావాలని విద్యార్థులు కోరారు.