రణరంగంగా మారుస్తాం: విద్యార్థి జెఎసి

హైదరాబాద్: శ్రీకృష్ణ కమిటీ విధివిధానాలకు వ్యతిరేకంగా తాము రేపు శనివారం తలపెట్టిన చలో అసెంబ్లీ కార్యక్రమాన్ని రణరంగంగా మారుస్తామని తెలంగాణ విద్యార్థుల ఐక్య కార్యాచరణ కమిటీ (జెఎసి) హెచ్చరించింది. ఉస్మానియా విశ్వవిద్యాలయంలో నక్సలైట్లు ఉన్నారని ప్రభుత్వం వాదించడం విడ్డూరమని జెఎసి నాయకులు శుక్రవారం మీడియా ప్రతినిధులతో అన్నారు. కాగా, ఉస్మానియా విశ్వవిద్యాలయంలో రేపు జరగాల్సిన పరీక్షలు వాయిదా పడ్డాయి.

ఉస్మానియా విశ్వవిద్యాలయంలో నక్సలైట్లు ఉన్నారని ప్రభుత్వం సుప్రీంకోర్టులో వాదించడాన్ని తెలంగాణ న్యాయవాదులు తప్పు పట్టారు. ఇప్పటి వరకు ఒక్క నక్సలైట్ నైనా అరెస్టు చేశారా అని వారు ప్రశ్నించారు. తెలంగాణ ఉద్యమాన్ని నీరు గార్చే ఉద్దేశంతోనే తప్పుడు ఆరోపణలతో ఉస్మానియాలో నక్సలైట్లు ఉన్నారని అంటోందని, ప్రభుత్వం కక్ష సాధింపు చర్యలకు దిగుతోందని వారున్నారు. తెలంగాణ అంతటా కేంద్ర బలగాలను దింపి ఉద్యమాన్ని అణచడానికి ప్రయత్నిస్తోందని వారు విమర్శించారు.