రాష్ట్రపతి ప్రసంగంపై తెలంగాణ ఎంపీల నిరనసన

న్యూఢిల్లీ: రాష్ట్రపతి ప్రసంగంలో తెలంగాణ అంశాన్ని ప్రస్తావించకపోవడాన్ని నిరసిస్తూ తెలంగాణ పార్లమెంటు సభ్యులు ప్రదర్సన చేశారు. పార్లమెంటు ఉభయ సభలను ఉద్దేశించి రాష్ట్రపతి చేసిన ప్రసంగంలో తెలంగాణ అంశం లేకపోవడాన్ని నిరసిస్తూ వారు సభ వెలుపలకు వచ్చి ప్రదర్శన చేశారు. తెలంగాణ ప్లకార్డులు ప్రదర్శించారు. ఆ తర్వాత తెలంగాణ కాంగ్రెసు పార్లమెంటు సభ్యులు ప్రధాని మన్మోహన్ సింగ్ ను కలిశారు. తెలంగాణ అంశంపై ప్రజలు తమపై ఒత్తిడి తెస్తున్నారని, తాము నియోజక వర్గాలకు వెళ్లలేకపోతున్నామని వారు ప్రధానికి చెప్పుకున్నారు. ఈ విషయం తనకు తెలుసునని ప్రధాని అన్నారు.

ఇదిలా వుంటే, సోమవారం ఉదయం తెలంగాణకు చెందిన న్యాయవాదులు జంతర్ మంతర్ వద్ద ధర్నాకు దిగారు. పార్లమెంటులో తెలంగాణ రాష్ట్ర ఏర్పాటుకు బిల్లును ప్రతిపాదించాలని వారు డిమాండ్ చేస్తూ ధర్నాకు దిగారు. ఈ కార్యక్రమానికి పెద్ద యెత్తున న్యాయవాదులు హాజరయ్యారు. జస్టిస్ శ్రీకృష్ణ కమిటీ వల్ల తమకు న్యాయం జరుగుతుందనే నమ్మకం లేదని ఈ కార్యక్రమానికి హాజరైన తెలంగాణ జెఎసి కన్వీనర్ ప్రొఫెసర్ కోదండరామ్ అన్నారు. తెలంగాణ రాష్ట్ర ఏర్పాటుకు పార్లమెంటులో బిల్లు పెడితే తప్ప నమ్మలేమని ఆయన మీడియా ప్రతినిధులతో అన్నారు.