కాంగ్రెసు నాయకురాలి కుమారుడికి ర్యాగింగ్ హింస

గుంటూరు: గుంటూరు జిల్లా పరిషత్ అధ్యక్షురాలు, కాంగ్రెసు నాయకురాలు కూచిపూడి విజయ కుమారుడు కృష్ణకాంత్(22)ను వడ్లమూడిలోని ఒక కార్పొరేట్ కళాశాలలో ర్యాగింగ్ చేసినట్టు పోలీసు కేసు నమోదైంది. అగ్రవర్ణాలకు చెందిన 30 మంది విద్యార్ధులు ర్యాగింగ్ పేరిట తన కుమారుడిని మానసికంగా శారీరకంగా హింసించారని విజయ పోలీసులకు ఫిర్యాదు చేశారు. అతను ఎస్ సి కావడంతో కులం పేరుతో దుర్భాషలాడారని అమె పేర్కొన్నారు.

బాధితుడు ముగ్గురు నిందితుల పేర్లను ఎఫ్ ఐ ఆర్ లో పేర్కొనగలిగాడని పోలీసులు చెప్పారు. ర్యాగింగ్ నిరోధక చట్టం కిందనే కాకుండా ఎస్ సి ఎస్ టి వేధింపుల నిరోధక చట్టం కింద కేసులు నమోదు చేశారు. రెండో చట్టం చాలా శక్తిమంతమైనది కావడంతో నిందితులకు నాన్ బెయిలబుల్ వారెంట్లు జారీ అయ్యే అవకాశముంది.

జెడ్పీ చైర్మన్ విజయ చాలా ఏళ్లపాటు నాగార్జున యూనివర్సిటీ బోటనీ అధ్యాపకురాలిగా పనిచేశారు. గుంటూరు జెడ్పీ ఎస్సీ మహిళకు రిజర్వు కావడంతో అప్పటి ముఖ్యమంత్రి వైఎస్ రాజశేఖరరెడ్డి ఆమెను గుర్తించి ఈ ఉన్నత పదవిని కట్టబెట్టారు. 2006 జెడ్పీ చైర్మన్ గా ఆమె ఏకగ్రీవంగా ఎన్నికయ్యారు.