కల్కి భగవాన్ పై వివాదాల దుమారం

హైదరాబాద్: లక్షల కొద్ది భక్తులను సంపాదించుకుని, ఆశ్రమాలను నడిపిస్తున్న కల్కి భగవాన్ పై రాష్ట్రంలో పెద్ద దుమారం చెలరేగుతోంది. కల్కి ఆశ్రమాల్లో అక్రమాలు, లైంగిక వేధింపులు జరుగుతున్నాయంటూ రెండు తెలుగు టీవీ చానెళ్లు వార్తా కథనాలను ప్రసారం చేస్తున్నారు. మహా టీవీ, టీవీ9 తెలుగు చానెళ్లలో కల్కి కాలం పేర వివాదం చెలరేగుతోంది. విజయ్ కుమార్ అనే తమిళనాడుకు చెందిన వ్యక్తి కల్కి అవతారమెత్తి ప్రజలను భక్తి పేరుతో మోసం చేస్తున్నాడంటూ ఆ చానెళ్లు ఆరోపించాయి. కల్కి భగవాన్, అమ్మ భగవాన్ తమ మోసాలను యధేచ్ఛగా మోసాలు సాగిస్తున్నారంటూ వార్తా కథనాలు ప్రసారం అవుతున్నాయి. కల్కి, అమ్మ భగవాన్ ల కటాక్షం పొంది ఆశ్రమవాసం దక్కిన తాతాజీలు కొందరు పోలీసులకు ఫిర్యాదు చేశారు. అలా ఫిర్యాదు చేసిన తాతాజీలపై అమ్మ భగవాన్ బూతులతో విరుచుకుపడ్డ మాటలను కూడా రికార్డు చేసి టీవీ9 వినిపించింది.

కల్కి భగవాన్ ఆశ్రమాల్లో ఆశ్రయం లభించిన భక్తులు మత్తులో ఊగుతూ, స్త్రీపురుష భేదం విస్మరించి ఆలింగనాలు చేసుకోవడం, బట్టలిప్పేసి ఇష్టారాజ్యంగా వ్యవహరించడం వంటి వీడియో చిత్రాలను ఆ టీవీ చానెళ్లు ప్రసారం చేస్తున్నాయి. కల్కి భగవాన్ దీక్షను తీసుకున్నవారిలో 57 లక్ష మంది దాకా ఉన్నట్లు ఆ టీవీ చానెళ్లు అంచనా వేస్తున్నాయి. వివిధ దర్శనాలు, పూజల పేర్లతో భక్తులను నిలువు దోపిడీ చేస్తున్నట్లు ఆరోపిస్తున్నాయి. విదేశీయులకు 21 రోజుల ప్రత్యేక ప్యాకేజీ ఉంది. భక్తులకు మాదక ద్రవ్యాలిచ్చి మత్తులో ముంచుతున్నారని కూడా ఆరోపిస్తున్నాయి. దేనికి ఎంత రేటు అనే విషయాలను కూడా టీవీ 9 ప్రసారం చేసింది. విజయకుమార్ అలియాస్ కల్కి కుమారుడు కృష్ణాజీ 3 వేల కోట్ల రియల్ ఎస్టేట్ వ్యాపారం చేస్తున్నట్లు ఆ చానెల్ ఆరోపించింది.