కల్కి భగవాన్ మాయావి: నారాయణ

హైదరాబాద్: కల్కి భగవాన్ ఒక మాయావి అని, లేహ్య రూపంలో డ్రగ్స్ ఇచ్చి యువకులను తన సేవకులుగా మార్చుకుంటున్నారని విజయవాడకు చెందిన కల్కి భగవాన్ మాజీ సేవకుడు నారాయణ ఆరోపించారు. కల్కి వద్ద ఎటువంటి మహిమలూ లేవని ఆయన సోమవారం మీడియా ప్రతినిధుల సమావేశంలో అన్నారు. తాను 12 ఏళ్లపాటు కల్కికి సేవకుడిగా పని చేశానని, ముక్తి కల్పిస్తానని చెప్పి తన వద్ద నుంచి సుమారు రూ.15 లక్షలు తీసుకుని మోసం చేశాడని చెప్పారు. కల్కి మాటలను నమ్మిన తనలాంటి ఎంతోమంది యువకులు సేవకులుగా చేరి లక్షల రూపాయలు వెచ్చిస్తూ తమ జీవితాలను నాశనం చేసుకుంటున్నారని ఆవేదన వ్యక్తం చేశారు.

ఒక్కో యువకుని నుంచి రూ.2000 తీసుకుంటాడని, మహా దశకు చేరాలంటే ఒక్కో సేవకుడు 60 మందిని చేర్పించాలని నిబంధన విధిస్తారని, వారి నుంచి రూ.5000 వసూలు చేస్తారని, ఇలా భక్తిని వ్యాపారంగా మారుస్తున్నారని వివరించారు. ప్రజా ధనాన్ని తన ఆస్తులు పెంచుకునేందుకు ఉపయోగించుకుంటున్నాడని, ఆయన ఆస్తులు ప్రస్తుతం లక్ష కోట్ల వరకు ఉంటాయని ఆయన ఆరోపించారు. దాసాజీల పేరిట సేవకులుగా చేర్చుకుని లక్షల కుటుంబాలను, యువకుల జీవితాలను ఆయన నాశనం చేస్తున్నాడన్నారు. కల్కి భగవాన్ పై తాను మానవ హక్కుల కమిషన్‌ను ఆశ్రయిస్తానని నారాయణ చెప్పారు. రాష్ట్రమంతటా ఆశ్రమాలు ఏర్పాటు చేస్తానని శిష్యుల పేరిట బినామీగా భూములు తీసుకుంటున్నారని ఆరోపించారు. ప్రస్తుతం కల్కి ఆశ్రమంలో ఉన్న దాసాజీలను బయటికి తీసుకువచ్చి ప్రభుత్వం వారికి కౌన్సెలింగ్ ఇప్పించాలని కోరారు. కల్కి ఆశ్రమంలో హత్యలు కూడా జరుగుతున్నాయని ఆయన ఆరోపించారు.