తెలంగాణ జెఎసికి తెరాస గుడ్ బై?

హైదరాబాద్: తెలంగాణ ఐక్య కార్యాచరణ సమితి (జెఎసి) నుంచి తెలంగాణ రాష్ట్ర సమితి (తెరాస) కూడా బయటకు వచ్చే అవకాశాలున్నాయి. జెఎసి ఏర్పాటులో కీలక పాత్ర పోషించిన తెరాస దాని ఉనికినే ప్రమాదంలో పడేసేందుకు సిద్ధపడింది. శ్రీకృష్ణ కమిటీని బహిష్కరించాలనే జెఎసి నిర్ణయంతో విభేదిస్తూ బయటకు రావాలని తెరాస అధ్యక్షుడు కె చంద్రశేఖర రావు నిర్ణయించుకున్నట్లు చెబుతున్నారు. శ్రీకృష్ణ కమిటీ ముందు తెలంగాణ వాదాన్ని బలంగా వినిపించేందుకే తెరాస ఈ నిర్ణయం తీసుకోనున్నట్లు తెలుస్తోంది. ఈ విషయంపై తెరాస పోలిట్ బ్యూరో బుధవారం అధికారికంగా నిర్ణయం తీసుకుంటుంది. తమ కన్నా తెలంగాణవాదాన్ని బలంగా వినిపించేవారు గైర్హాజరయితే నష్టం జరగవచ్చుననే అభిప్రాయం వ్యక్తమవుతోందని తెరాస నాయకుడు హరీష్ రావు అన్నారు.

తెరాస నిర్ణయం మార్పులో రాష్ట్ర గవర్నర్ నరసింహన్ ప్రముఖ పాత్ర పోషించినట్లు చెబుతున్నారు. హోలీ పర్వదినంనాడు కెసిఆర్ నరసింహన్ ను కలిశారు. దీనిపై గవర్నర్ నరసింహన్ కెసిఆర్ తో మాట్లాడినట్లు చెబుతున్నారు. శ్రీకృష్ణ కమిటీని బహిష్కరించే విషయంలో తెలంగాణ జెఎసి కూడా కాస్తా మెత్తబడినట్లు కనిపిస్తోంది. శ్రీకృష్ణ కమిటీ రాక సందర్భంగా నిరసనలు మాత్రమే వ్యక్తం చేయాలని, తమ వ్యతిరేకత కమిటీపై కాదనీ కేంద్ర ప్రభుత్వం మీదనే అనీ జెఎసి కన్వీనర్ కోదండరామ్ అన్నారు. దీన్ని బట్టి శ్రీకృష్ణ కమిటీ ముందు వాదనలు వినిపించడం వైపు మొగ్గు పెరుగుతున్నట్లు తెలుస్తోంది.