లిఫ్టులో ఇరుక్కుపోయిన చిరంజీవి

హైదరాబాద్: ప్రజారాజ్యం పార్టీ అధినేత చిరంజీవికి మంగళవారం విచిత్రమైన పరిస్థితి ఎదురైంది. హైదరాబాదులోని విద్యుత్ సౌధలో ఆయన కొద్దిసేపు చిక్కుకుపోయారు. రాష్ట్రంలో విద్యుత్ కోరతను నిరసిస్తూ ప్రజారాజ్యం పార్టీ నాయకులు, కార్యకర్తలు విద్యుత్ సౌధ వద్ద ధర్నా చేపట్టారు. ఈ సందర్భంగా విద్యుత్ అధికారులకు వినతిపత్రం ఇవ్వడానికి చిరంజీవి విద్యుత్ సౌధలోకి వెళ్లారు. అధికారులకు వినతిపత్రం సమర్పించి తిరిగి లిఫ్టులో తిరిగి వస్తుండగా విద్యుత్ సరఫరా ఆగిపోయి లిఫ్టు ఆగిపోయింది. దీంతో ఆయన లిఫ్టులో చిక్కిపోయారు. కొద్ది సేపటి తర్వాత విద్యుత్ సౌధ సిబ్బంది ఆయనను క్షేమంగా బయటకు తీశారు.

విద్యుత్ సౌధలోకి వినతిపత్రం ఇవ్వడానికి వెళ్లిన చిరంజీవి మరో గడ్డు సమస్య కూడా ఎదురైంది. చిరంజీవి సమైక్యవాదానికి మద్దతు ఇవ్వడంపై తెలంగాణ ప్రాంత ఉద్యోగులు ఆయనను ప్రశ్నించారు. చిరంజీవి వైఖరిని వారు తప్పు పట్టారు. అంతకు ముందు ప్రజారాజ్యం పార్టీ కార్యకర్తలు, నాయకులు, శాసనసభ్యులు నెక్లెస్ రోడ్డు నుంచి విద్యుత్ సౌధ వరకు ర్యాలీ తలపెట్టారు. వారిని పోలీసులు ఖైరతాబాద్ చౌరస్తాలో అడ్డుకునే ప్రయత్నం చేశారు. ఈ సమయంలో చిరంజీవి ప్రభుత్వంపై తీవ్ర విమర్శలు చేశారు.