మానవ తప్పిదం వల్లనే వరదలు: బాబు

కర్నూలు: మానవ తప్పిదం వల్లనే కర్నూలును వరదలు ముంచెత్తాయని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్శించారు. వరదల నివారణకు ముందు జాగ్రత్త చర్యలు తీసుకోవడంలో ప్రభుత్వ యంత్రాంగం విఫలమైందని ఆయన అన్నారు. వరద తాకిడికి గురైన కర్నూలులో ఆయన శనివారం పర్యటించారు. ఈ సందర్భంగా ఆయన మీడియా ప్రతినిధులతో మాట్లాడారు. వరదల తర్వాత సహాయక చర్యలు చేపట్టడంలో కూడా ప్రభుత్వం పూర్తిగా విఫలమైందని ఆయన విమర్శించారు.

మంగళసూత్రాలు అమ్ముకుని వరదల నుంచి ప్రజలు ప్రాణాలను కూపాడుకున్నారని ఆయన అన్నారు. వరద తాకిడి ప్రాంతాల్లో మంత్రులు పర్యటించలేదని ఆయన అన్నారు. తెలంగాణను అడ్డుకోవడానికి ముఖ్యమంత్రి రోశయ్యతో తాను కుమ్మక్కయినట్లు జరుగుతున్న ప్రచారాన్ని తిప్పికొట్టాలని ఆయన తెలంగాణ పార్టీ శ్రేణులకు పిలుపునిచ్చారు.