తెలంగాణ జెఎసి నుంచి టిడిపి బహిష్కరణ

హైదరాబాద్: తెలంగాణ ఐక్య కార్యాచరణ కమిటీ (జెఎసి)నుంచి తెలుదేశం పార్టీ బహిష్కరణకు గురైంది. శుక్రవారం ఆర్థరాత్రి ఈ మేరకు జెఎసి కన్వీనర్ ప్రొఫెసర్ కోదండరామ్ ప్రకటన చేశారు. అంతకు ముందు జెఎసి సమావేశం జరిగింది. ఈ సమావేశానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో పాటు జయశంకర్, విఠల్ తదితరులు హాజరయ్యారు. న్యాయవాదులపై దాడికి నిరసనగా, మహబూబ్ నగర్ జిల్లాలో తెలుగుదేశం పార్టీ అధ్యక్షుడు నారా చంద్రబాబు నాయుడి పర్యటన సందర్భంగా జెఎసి నేతల అరెస్టుకు నిరసనగా జెఎసి ఆ నిర్ణయం తీసుకుంది. జెఎసిని తెలుగుదేశం పార్టీ కవచంగా వాడుకుంటోందని జెఎసి అభిప్రాయపడింది.

డిసెంబర్ 9వ తేదీ చిదంబరం ప్రకటన తర్వాత తెలుగుదేశం పార్టీకి గ్రామాల్లోకి వెళ్లలేని పరిస్థితి ఏర్పడిందని, ప్రజల నుంచి వస్తున్న ఒత్తిడిని తట్టుకోవడానికి, ఇబ్బంది లేకుండా చేసుకోవడానికి తెలుగుదేశం పార్టీ జెఎసిలో చేరిందని, తెలంగాణ ఉద్యమంలో చిత్తశుద్ధితో పాల్గొనలేదని జెఎసి నాయకులు అభిప్రాయపడ్డారు. జెఎసిలో ఉంటూనే తెలంగాణ ఉద్యమాన్ని తెలుగుదేశం పార్టీ నాయకులు నీరు గార్చే ప్రయత్నం చేశారని కూడా ఆభిప్రాయపడ్డారు.