హైదరాబాద్ ఫ్రీజోన్ గానే ఉండాలి: రాజగోపాల్

విజయవాడ: హైదరాబాద్ ఫ్రీజోన్ పై రాజ్యాంగ సవరణ తీర్మానాన్ని ప్రవేశపెట్టకుండా చూడాలని కోరుతూ, రాష్ట్ర ముఖ్యమంత్రి రోశయ్యకు కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ బుధవారం లేఖ రాశారు. ఫ్రీజోన్‌పై రాజ్యాంగ సవరణ తీర్మానం పెట్టటం వల్ల అన్ని ప్రాంతాల ప్రజలు తీవ్ర ఇబ్బందులకు గురవుతారని ఆయన అన్నారు. కొంతమంది నాయకులు సవరణ తీర్మానాన్ని ప్రవేశపెట్టేందుకు ప్రయత్నించటం దురదష్టకరమని ఆయన అన్నారు. ఈ అంశంపై దాఖలైన పిటీషన్‌ను సుప్రీంకోర్టు తోసిపుచ్చటాన్ని ఆయన సమర్థించారు. అయితే 1969, 1972లో జై తెలంగాణ, జై ఆంధ్ర ఆందోళనల సమయంలో జారీ చేసిన రాష్ట్రపతి ఉత్తర్వులను అమలు చేయాలని కోరారు. మాజీ ప్రధాని ఇందిరాగాంధీ హయాంలో జరిగిన రాజ్యాంగ సవరణలో పొందుపరిచిన విధంగా హైదరాబాద్‌లో పోలీసుశాఖ నియామకాలు చేపట్టాలని సూచించారు. అదే సమయలో 610 జీఓను కూడా అమలు చేయాల్సిన అవసరం ఉందన్నారు.

రాష్ట్ర రాజధానిలో అన్ని ప్రాంతాలకు చెందిన పోలీసులు ఉండటం న్యాయమని ఆయన అభిప్రాయపడ్డారు. ఒకే ప్రాంతానికి చెందిన వారుంటే పక్షపాతంతో వ్యవహరించే ప్రమాదం ఉందని ఆయన అన్నారు. ఇటీవల కూకట్‌పల్లి, ఓయూ, బీహెచ్ఈఎల్ ప్రాంతాలలో జరిగిన సంఘటనలే ఇందుకు నిదర్శనమని పేర్కొన్నారు. ఇప్పటికీ పలుచోట్ల పోలీసులు పక్షపాత ధోరణితోనే వ్యవహరిస్తుండటం వల్ల అనేక దుష్పరిణమాలు సంభవిస్తున్నాయని ఆందోళన వ్యక్తం చేశారు. తాను నిమ్స్ ఆసుపత్రిలో ఉన్నపుడు చేసేందుకు వచ్చే వారిని పోలీసులు అనుమతించలేదని గుర్తు చేశారు. అంతకుముందు అదే ఆసుపత్రిలోవేరే వ్యక్తి ఉన్నపుడు పోలీసులు ఎంతోమందిని అనుమతించారని ఆయన అన్నారు. హైదరాబాద్ ఫ్రీజోన్ కాకపోతే తెలంగాణ జిల్లాలవారు కూడా నష్టపోతారని ఆయన అన్నారు.