విజయవాడలో నిమ్స్ తరహా ఆస్పత్రి

విజయవాడ: విజయవాడ నగరంలో హైదరాబాద్ నిమ్స్‌ తరహాలో సూపర్‌ స్పెషాల్టీ ఆస్పత్రిని నిర్వహించే యోచనలో ప్రభుత్వం ఉంది. ఆధునిక వైద్యసేవలకు తలమానికంగా నిలిచిన నిమ్స్‌ను ఆదర్శంగా తీసుకుని పీపీపీ (పబ్లిక్‌ ప్రైవేట్‌ పార్టిసిపేషన్‌) విధానాన్ని అమలులోకి తీసుకురానున్నారు. ఈ విధానం వల్ల కోస్తాజిల్లాల ప్రజల చిరకాల వాంఛగా మిగిలిన సూపర్‌ స్పెషాలిటీ ఆస్పత్రి నిర్వహణలో ఎటువంటి లోటుపాట్లు ఉండవని భావిస్తున్నారు. రూ 70 కోట్లతో ఏర్పాటుకానున్న ఈ సూపర్‌ స్పెషాలిటీలో ప్రస్తుతం అందుబాటులో ఉన్న న్యూరాలజీ, న్యూరోసర్జరీ, గాస్ట్రోఎంట్రాలజీ, ప్లాస్టిక్‌ సర్జరీ, కార్డియాలజీతోపాటు నెఫ్రాలజీ, కార్డియాక్‌ సర్జరీ, సర్జికల్‌ అంకాలజీ, మెడికల్‌ అంకాలజీ తదితర కొత్త సేవలు ఉచితంగా అందుబాటులోకి రానున్నాయి.

వైద్యులు, సిబ్బంది కొరత, వారి పనితీరు, నిర్వహణ తదితర అంశాలను పరిగణనలోకి తీసుకున్న ప్రభుత్వం పీపీపీ విధానంపై ఆసక్తి చూపుతోంది. ఈ నెల 19న రాజధానిలో జరగనున్న సమావేశంలో సూపర్‌ స్పెషాల్టీ ఆస్పత్రి ఏర్పాటుకు జీవో విడుదల కానుంది. ఆ సమయంలోనే దీని నిర్వహణపై నిర్ణయం తీసుకుంటారు. ప్రస్తుతం నగరంలోని ఆస్పత్రిలో వివిధ విభాగాల్లో 40 మంది దాకా వైద్యుల కొరత ఉంది. కాంట్రాక్టు విధానంలో వైద్యుల నియామకాలు జరుగుతున్నా వారి సేవలు అంతంత మాత్రంగానే ఉంటున్నాయి.