రోశయ్య పదవిని కాపాడుకోవడానికే: పయ్యావుల

హైదరాబాద్: ముఖ్యమంత్రి కె రోశయ్య తన పదవిని కాపాడుకోవడానికే ముఖ్యమంత్రి కె రోశయ్య హైదరాబాద్ ఫ్రీజోన్ అంశంపై తీర్మానం ప్రతిపాదించారని తెలుగుదేశం పార్టీ శాసనసభ్యుడు పయ్యావుల కేశవ్ వ్యాఖ్యానించారు. ఫ్రీజోన్ పై శాసనసభలో ఏకవాక్య తీర్మానాన్ని ఆమోదించిన తర్వాత ఆయన మీడియా ప్రతినిధులతో మాట్లాడారు. ఫ్రీజోన్ పై ఏకవాక్య తీర్మానం చేయడంపై సీమాంధ్ర శాసనసభ్యులు ప్రభుత్వంపై తీవ్రంగా మండిపడ్డారు. పదవి కోసం రోశయ్య రాష్ట్ర ప్రయోజనాలను ఫణంగా పెట్టారని కేశవ్ విమర్శించారు. శాసనసభ చరిత్రలో ఇది చీకటిరోజు అని ఆయన అన్నారు.

రాష్ట్ర చరిత్రలో ఓ రోజు చీకటిరోజుగా మిగిలిపోతుందని ఆయన అన్నారు. రోశయ్య ఒక మచ్చగా మిగిలిపోతారని ఆయన అన్నారు. ఈ తీర్మానంపై ప్రభుత్వ వైఖరిని ప్రజల్లోకి తీసుకు పోతామని ఆయన చెప్పారు. తీర్మానాన్ని ఏకపక్షంగా ఆమోదించడం అన్యాయమని ఆయన అన్నారు. సీమాంధ్ర ప్రజలు రోశయ్యను క్షమించరని ఆయన అన్నారు. ఫ్రీజోన్ పై తాము శాసనసభలో చర్చ జరగాలని కోరుకున్నామని ఆయన చెప్పారు.