పెళ్లికి ముందు సెక్స్ తప్పు కాదు: సుప్రీం
సహ జీవనమనేది జీవించే హక్కులో భాగమని సుప్రీంకోర్టు స్పష్టం చేసింది. ప్రాథమిక హక్కులను కల్పించిన 21వ అధికరణను గుర్తు చేసింది. ఖుష్బూ వ్యాఖ్యలు ఆమె వ్యక్తిగతమని తెలిపింది. "ఆమె అభిప్రాయాలు ఆమె చెప్పారు. మధ్యలో మీకొచ్చిన సమస్యేమిటి? మా కైతే ఏ బాధా లేదు. అది ఎలా నేరం? ఏ చట్టం కింద నేరం? ద యచేసి చెప్పండి!' అంటూ ధర్మాసనం ప్రశ్నల వర్షం కురిపించింది. ఖుష్బూ వ్యాఖ్యలు యువతను పెడదోవ పట్టించేలా ఉన్నాయనే వాదనలను కూడా ధర్మాసనం తోసిపుచ్చింది. "ఖుష్బూ ఆ ఇంటర్వ్యూ ఇచ్చిన తర్వాత అమ్మాయిలెవరైనా ఇళ్లలోంచి లేచిపోయారా? ఇందుకు ఆధారాలు చూపించగలరా? ఆమె వ్యాఖ్యలు ఎన్ని కుటుంబాలపై ప్రభావం చూపించాయో చెప్పగలరా ?" అని న్యాయవాదిని నిలదీసింది. 'మీకు కుమార్తెలు ఉన్నారా?' అని ప్రశ్నించింది. న్యాయవాది 'లేరు' అని బదులిచ్చారు. ఆ వెంటనే - 'మరి ఖుష్బూ ఇంటర్వ్యూ మీపై ఎలాంటి దుష్ప్రభావం చూపినట్లు?' అని న్యాయస్థానం ప్రశ్నించింది. ఈ కేసులో విచారణను ముగించి, తీర్పును వాయిదా వేసింది. కుష్బూ కూడా కోర్టు హాజరయ్యారు. అందరి కళ్లు ఆమెపైనే నిలిచారు.