అసెంబ్లీ: రోశయ్య, బాబు వాగ్వాదం

హైదరాబాద్: రాష్ట్రంలోని మూడు రోడ్ల కాంట్రాక్టులపై ముఖ్యమంత్రి కె రోశయ్య, ప్రతిపక్ష నాయకుడు నారా చంద్రబాబు నాయుడు మధ్య తీవ్ర వాగ్వివాదం చోటు చేసుకుంది. ప్రభుత్వ, ప్రైవేట్ భాగస్వామ్యంలో చేపట్టిన మూడు రోడ్ల టెండర్లు రద్దు చేయాలని, కొత్తగా టెండర్లు పిలవాలని చంద్రబాబు ప్రభుత్వాన్ని డిమాండ్ చేశారు. వీటిని దక్కించుకున్న కాంట్రాక్టర్ల వెనక పెద్దలున్నారని ఆయన ఆరోపించారు. ప్రైవేట్ భాగస్వామ్యంలో చేపట్టిన ఈ రోడ్లకు సంబంధించిన పైళ్లను స్పీకర్ వద్ద పెట్టాలని ఆయన డిమాండ్ చేశారు.

రోడ్ల కాంట్రాక్టుల్లో లాలూచీ పడ్డారని, ఎక్కువ కోట్ చేశారని చంద్రబాబు అన్నారు. ఇందులో భాగంగానే ఛటర్జీ అనే అధికారిని బదిలీ చేశారని, ఓ ఇంజినీరును బెదిరిస్తున్నారని ఆయన ఆరోపించారు. దీనికి ముఖ్యమంత్రి కె రోశయ్య ప్రతిస్పందిస్తూ తెలుగుదేశం ప్రభుత్వ హయాంలో ఎన్ని ఆరోపణలు వచ్చాయి, ఎన్ని ఆరోపణల్లో స్పీకర్ వద్ద ఫైళ్లు పెట్టారో చెప్పాలని అన్నారు. పాలనలో లోపాలుంటే ఎత్తిచూపి ప్రతిపక్షంగా తెలుగుదేశం బాధ్యత నిర్వహించాలని ఆయన సూచించారు. తాము స్పీకర్ వద్ద ఫైళ్లు పెట్టిన సందర్భాలున్నాయని చంద్రబాబు జవాబిచ్చారు. కాంట్రాక్టుల్లో అవినీతికి పాల్పడడానికే ఛటర్జీని బదిలీ చేశారనే ఆరోపణల్లో నిజం లేదని ముఖ్యమంత్రి చెప్పారు. ఇంజినీరును ఎవరు బెదరిస్తున్నారో చెప్పాలని ఆయన డిమాండ్ చేశారు.