బీహార్ లో మావోయిస్టుల విధ్వంసం

పాట్నా: బీహార్ లోని రోహతాస్ జిల్లాలో మావోయిస్టులు కొత్తగా కట్టిన పోలీసు స్టేషన్ ను, బ్లాక్ కార్యాలయాన్ని పేల్చేశారు. వారు 15 ట్రక్కులను కూడా పేల్చేశారు. వీటిలో 8 ట్రక్కులు రోడ్డు నిర్మాణ పనులు చేపట్టిన ప్రైవేట్ కంపెనీవని పోలీసులు శనివారం చెప్పారు.

దాదాపు వంద మంది సాయుధ మావోయిస్టులు విచక్షణారహితంగా శుక్రవారం రాత్రి టిలౌతులోని కొత్తగా నిర్మించిన పోలీసు స్టేషనుపై దాడి చేశారు. బ్లాక్ కార్యాలయంపై కూడా దాడి చేశారు. డైనమైట్ తో భవనాన్ని పేల్చివేశారు. ఈ దాడుల్లో ఏ విధమైన ప్రాణ నష్టం సంభవించలేదు. దీంతో పోలీసులు ఆ ప్రాంతంలో గాలింపు చర్యలు చేపట్టారు. మూడు రోజుల క్రితం మావోయిస్టులు నిర్మాణంలో ఉన్న పోలీసు స్టేషన్ భవనాన్ని పేల్చేశారు.