బాబు నివేదిక ఇవ్వాల్సిన పని లేదు: ఎర్రం

హైదరాబాద్: రాష్ట్ర పరిస్థితిపై కేంద్ర ప్రభుత్వం వేసిన జస్టిస్ శ్రీకృష్ణ కమిటీకి తమ పార్టీ అధ్యక్షుడు నారా చంద్రబాబునాయుడు నివేదిక సమర్పించాల్సిన అవసరం లేదని తెలుగదేశం పార్టీ పోలిట్ బ్యూరో సభ్యుడు కె. ఎర్రన్నాయుడు అన్నారు. తెలంగాణపై తమ పార్టీ గతంలో తీసుకున్న నిర్ణయానికి కట్టుబడి ఉందని, పార్టీ వైఖరిలో మార్పు లేదని, పార్టీ తెలంగాణకు కట్టుబడి ఉందని ఆయన గురువారం మీడియా ప్రతినిధుల సమావేశంలో చెప్పారు.

వ్యక్తిగతంగా తాను సమైక్యవాదినని ఆయన చెప్పారు. రాష్ట్ర విభజన వల్ల రెండు ముఖ్యమంత్రి పదవులు రావడం, రెండు హైకోర్టులు ఏర్పడడం మినహా ఒరిగేదేమీ ఉండదని ఆయన అన్నారు. తమ పార్టీకి చెందిన రెండు ప్రాంతాల నాయకులు వేర్వేరుగా శ్రీకృష్ణ కమిటీకి రెండు నివేదికలు సమర్పిస్తారని ఆయన చెప్పారు. శ్రీకాకుళం జిల్లా నుంచి ఆదిలాబాద్ జిల్లా వరకు జరిగిన అభివృద్ధిని తాను శ్రీకృష్ణ కమిటీకి సమర్పిస్తానని ఆయన అన్నారు.