రెండు రోజుల్లో కర్ఫ్యూ ఎత్తివేత: ఖాన్

హైదరాబాద్: హైదరాబాద్ లో అల్లర్లు చెలరేగిన ప్రాంతాల్లో విధించిన కర్ఫ్యూను రెండు రోజుల్లో పూర్తిగా ఎత్తేస్తామని హైదరాబాద్ నగర పోలీసు కమిషనర్ ఎకె ఖాన్ చెప్పారు. 25 పోలీసు స్టేషన్ల పరిధిలో విధించిన కర్ఫ్యూను శనివారం కొద్దిసేపు సడలించారు. ఈ రోజు పరిస్థితిని సమీక్షించి రెండు రోజుల్లో కర్ఫ్యూను పూర్తిగా ఎత్తేవేసే విషయంపై నిర్ణయం తీసుకుంటామని ఆయన చెప్పారు. పరిస్థితి చాలా మెరుగు పడిందని ఆయన మీడియా ప్రతినిధులతో అన్నారు. మతాలకు అతీతంగా ప్రజలు ప్రశాంత వాతావరణాన్ని కోరుకుంటున్నారని ఆయన అన్నారు.

నిత్యావసర సరుకులపై కొంత గందరగోళం ఉందని, అయితే మొన్నటి కన్నా ఈ రోజు పరిస్థితి మెరుగ్గా ఉందని ఆయన అన్నారు. ప్రజలకు నిత్యావసర సరుకులను అందుబాటులో ఉంచేందుకు ప్రభుత్వం చర్యలు తీసుకుందని ఆయన చెప్పారు. కాగా, నిత్యావసర సరుకుల పంపిణీపై రాష్ట్ర పౌర సరఫరాల మంత్రి జూపల్లి కృష్ణారావు పరిశీలించారు. కర్ఫ్యూ సడలించిన సమయాల్లో ఆయన శనివారం పాతబస్తీలో పర్యటిస్తారు. పాతబస్తీలోని చౌక ధరల దుకాణాలను ఆయన పరిశీలించారు.