బాబు, చిరు, కెసిఆర్ ఫోన్ ల ట్యాపింగ్?

హైదరాబాద్ : రాష్ట్రంలోని ప్రతిపక్ష నేతల ఫోన్ ల ట్యాపింగ్ కూడా జురుగుతోందని ఓ ప్రైవేట్ తెలుగు టీవీ చానెల్ వార్తాకథనాన్ని ప్రసారం చేసింది. శానససభ, లోకసభ జమిలి ఎన్నికలకు ముందు తన ఫోన్ ల ట్యాపింగ్ జరుగుతున్నట్లు తెలుగుదేశం పార్టీ అధ్యక్షుడు నారా చంద్రబాబునాయుడు ఆరోపించారు. ఎన్నికలకు ముందు దివంగత నేత వైయస్ రాజశేఖర రెడ్డి ప్రభుత్వం ప్రతిపక్ష నేతలు చంద్రబాబు, చిరంజీవి, కె. చంద్రశేఖరరావు, రాఘవులు, నారాయణ టెలిఫోన్లను ట్యాప్ చేసిందని ఆంధ్రజ్యోతి - ఎబిఎన్ టీవీ చానెల్ శనివారం ఓ వార్తాకథనాన్ని ప్రసారం చేసింది. ఈ ఫోన్ ట్యాపింగులు ఇప్పటికీ జరుగుతున్నట్లు ఆ వార్తాకథనం తెలిపింది.

శరద్ పవార్, నితీష్ కుమార్ తదితర నేతల ఫోన్ లను ట్యాప్ చేసినట్లు ఓ ఆంగ్ల వారపత్రికలో వార్తాకథనం వచ్చిన నేపథ్యంలో ఆంధ్రజ్యోతి - ఎబిఎన్ చానెల్ ఈ వార్తాకథనాన్ని ప్రసారం చేసింది. రాష్ట్రంలోని ప్రతిపక్ష నాయకుల టెలిఫోన్లు ఇప్పటికీ ట్యాప్ అవుతున్నట్లు ఆ చానెల్ అనుమానాలు వ్యక్తం చేసింది. రాష్ట్రంలోని సీనియర్ జర్నలిస్టుల ఫోనులను కూడా ట్యాప్ చేస్తున్నట్లు ఆరోపించింది. ఎన్నికలకు ముందు ప్రతిపక్ష నేతల పోన్ లను ట్యాప్ చేయడం వల్ల లభించిన వివరాల ఆధారంగా దివంగత నేత వైయస్ రాజశేఖర రెడ్డి ప్రతివ్యూహాలను రచిస్తూ వచ్చారని విమర్శించింది.