ఫోన్ ట్యాపింగ్ పై దద్దరిల్లిన పార్లమెంటు

న్యూఢిల్లీ: ఫోన్ ట్యాపింగ్ వ్యవహారంపై సోమవారం పార్లమెంటు ఉభయ సభలు దద్దరిల్లాయి. ఎన్సీపి నేత శరద్ పవార్ తో పాటు ప్రకాష్ కారత్, నితీష్ కుమార్ వంటి ప్రతిపక్ష నేతల ఫోన్ ల ట్యాపింగ్ జరుగుతున్నాయని ఒక మ్యాగజైన్ లో వార్తాకథనం ప్రసారమైంది. దీనిపై ప్రతిపక్షాలు లోకసభ, రాజ్యసభల్లో ప్రభుత్వాన్ని నిలదీశాయి. దీంతో సభా కార్యక్రమాలు స్తంభించాయి. ఉభయ సభలు కూడా తొలుత 12 గంటల వరకు వాయిదా పడ్డాయి.

తీవ్ర గందరగోళం మధ్యనే హోం మంత్రి పి. చిదంబరం లోకసభలో ప్రకటన చేశారు. ఫోన్ ట్యాపింగ్ కు తాము ఏ సంస్థను కూడా ఆదేశించలేదని ఆయన స్పష్టం చేశారు. ఫోన్ ట్యాపింగ్ ఆరోపణలపై ప్రభుత్వం దర్యాప్తు చేస్తోందని, అందుకు సంబంధించి ఆధారాలు లభిస్తే విచారణ జరిపిస్తామని ఆయన చెప్పారు. ఫోన్ ట్యాపింగ్ ఆరోపణలపై ప్రధాని కూడా వివరణ ఇస్తారని ఆర్థిక మంత్రి ప్రణబ్ ముఖర్జీ చెప్పారు.