ప్రజలు విభజనకు వ్యతిరేకం: లగడపాటి

తిరుపతి: రాష్ట్ర విభజనను తెలుగు ప్రజలు ఏనాడూ కోరుకోలేదని, కొందరి స్వార్థ రాజకీయాల కారణంగా ప్రాంతీయ విధ్వేషాలు ఏర్పడుతున్నాయని కాంగ్రెసు పార్లమెంటు సభ్యుడు లగడపాటి రాజగోపాల్‌ అన్నారు. ఆదివారం తిరుపతి ప్రెస్‌ క్లబ్‌ లో మీడియా సమావేశంలో ఆయన మాట్లాడారు. ప్రాంతీయ వాదాన్ని రెచ్చగొట్టే పార్టీల గుర్తింపు రద్దు చేయాలని ఎన్నికల కమిషన్‌ ను డిమాండ్‌ చేసినట్లు తెలిపారు.

రాజకీయ నాయకులు పత్రికా రంగంలోకి రావడం మంచిది కాదని ఆయన అభిప్రాయపడ్డారు. సమైక్యాంధ్ర పరిరక్షణ సమితి (సాప్స్‌) ఆధ్వర్యంలో సమైక్యాంధ్ర ప్రజా ప్రతినిధుల సదస్సులో ఆయన పాల్గొన్నారు. జిల్లా ప్రభుత్వాలను ఏర్పాటు చేస్తే అనుకున్నంత అభివృద్ధి జరుగుతుందని చెప్పారు. సమైక్యాంధ్ర ఉద్యమం ప్రజల గుండెల్లో నుంచి వచ్చిందని దీనిని అడ్డుకోవడం ఎవ్వరి వల్లాకాదని ఉద్ఘాటించారు.