తెరాస ఉగ్రవాద సంస్థ: లగడపాటి

న్యూఢిల్లీ: తెలంగాణ రాష్ట్ర సమితి (తెరాస)ని విజయవాడ కాంగ్రెసు పార్లమెంటు సభ్యుడు లగడపాటి రాజగోపాల్ ఉగ్రవాద సంస్థగా అభివర్ణించారు. అది ప్రజాస్వామ్యం ముసుగులో ఉన్న ఉగ్రవాద సంస్థ అని ఆయన అన్నారు. తెరాస ఎన్నికల గుర్తింపును రద్దు చేయాలని ఆయన కేంద్ర ఎన్నికల ప్రధానాధికారి నవీన్ చావ్లాను కోరారు. నవీన్ చావ్లాకు రాసిన లేఖను ఆయన సోమవారం ఢిల్లీలో మీడియా ప్రతినిధులకు విడుదల చేశారు.

అంతర్యుద్ధం సృష్టిస్తామని తెరాస అధ్యక్షుడు కెసిఆర్ పదే పదే అనడం ప్రజా ప్రాతినిధ్య చట్టంలోని 29ఎ (5)కు విరుద్ధమని ఆయన అన్నారు. దేశ సమగ్రతకు ముప్పు వాటిల్లేలా మాట్లాడుతున్న తెరాస శ్రేణులపై చర్యలు తీసుకోవాలని కోరుతూ కేంద్ర హోం మంత్రి పి. చిదంబరానికి మరో లేఖ రాసినట్లు ఆయన తెలిపారు. అంతర్యుద్ధం సృష్టిస్తామని కెసిఆర్ అన్నారో లేదో శ్రీకృష్ణ కమిటీ బహిర్గతం చేయాలని ఆయన కోరారు. కేంద్ర హోం శాఖ ఏర్పాటు చేసిన కమిటీని బెదిరిస్తే అది ఎలా నివేదిక ఇవ్వగలుగుతుందని ఆయన అడిగారు.