పాక్ లో ఆత్మాహుతి దాడి: నలుగురు మృతి

పెషావర్: పాకిస్తాన్ లోని పెషావర్ శివారులో గల పోలీసు చెక్ పోస్టుపై బుధవారం తెల్లవారు జామున ఆత్మాహుతి కారు బాంబు పేలింది. ఇందులో నలుగురు పోలీసులు మరణించారు. ఓ మహిళతో సహా పది మంది గాయపడ్డారు. తీర్ బలా గ్రామంలోని చెక్ పోస్టులోకి ఆత్మాహుతి దళ సభ్యుడు పేలుడు పదార్థాలతో కూడిన కారును నడిపించుకుంటూ వచ్చే పేల్చేశాడు.

వాహనం గిరిజన ప్రాంతం నుంచి వచ్చిందని, దానిలో నిండా పేలుడు పదార్థాలున్నాయని, ఆత్మాహుతి దళ సభ్యుడు మొహమంద్ నుంచి వచ్చాడని పోలీసు అధికారి లియాఖత్ అలీ చెప్పారు. మట్టి, ఇటుకలతో కట్టిన సాధారణమైన చెక్ పోస్టు భవనం దాడిలో ధ్వంసమైంది. పక్కనే ఉన్న ఇల్లు, మసీదు కూడా దెబ్బ తిన్నాయి. విధుల్లో ఉన్న పోలీసులు దాడిలో మరణించినట్లు అధికారులు తెలిపారు.