చిరంజీవిది గుండాగిరి: విజయశాంతి

హైదరాబాద్: ప్రజారాజ్యం పార్టీ అధ్యక్షుడు చిరంజీవిది బయటకు గాంధీగిరి, లోపల గుండాగిరి అని తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి వ్యాఖ్యానించారు. చిరంజీవిపై ఆమె మంగళవారం సాయంత్రం తీవ్రంగా ధ్వజమెత్తారు. ప్రజారాజ్యం గుండాల పార్టీ అని ఆమె అన్నారు. పిఆర్‌పి అంటే పబ్లిక్ రిజెక్టెడ్ పార్టీ అని ఎద్దేవా చేశారు. పీఆర్పీని గుండాల పార్టీ అని కూడా అభివర్ణించారు. ఆమె మంగళవారం తన నివాసంలో టీవీ చానళ్లతో మాట్లాడారు.

చిరంజీవి లక్ష్యంలేని నాయకుడని దుయ్యబట్టారు. పీఆర్పీలోని మహిళా నేతలకు సభ్యత, సంస్కారంలేవని ఆరోపించారు. చిరంజీవి దుకాణం ఇప్పటికే తెలంగాణలో బంద్ అయిందని, త్వరలో ఆంధ్రా, రాయలసీమల్లో కూడా బంద్ అవుతుందన్నారు. చిరంజీవిని తాము ఒక పార్టీ నాయకుడిగా పరిగణించటంలేదని, చిరంజీవికి అసలు నాయకత్వ లక్షణాలే లేవని చెప్పారు. చిరంజీవితో కలిసి లగడపాటి తెలంగాణలో పర్యటిస్తానని చెప్పటాన్ని కూడా విజయశాంతి తప్పుపట్టారు. దొంగలు దొంగలు ఒక్కటై తెలంగాణలో పర్యటిస్తారా? అని ప్రశ్నించారు.