నార్కో పరీక్షలపై సుప్రీంకోర్టు ఆంక్షలు

న్యూఢిల్లీ: నార్కో అనాలిసిస్ పరీక్షలపై సుప్రీంకోర్టు ఆంక్షలు విధించింది. సత్యశోధన, నేర నిర్థారణ కోసం చేసే నార్కో అనాలసిస్‌, బ్రెయిన్‌ మ్యాపింగ్‌ పరీక్షలపై సుప్రీంకోర్టు ఆంక్షలు విధించింది. ఈ పరీక్షలు చేపట్టే ముందు వ్యక్తి లేదా నిందితుని ముందస్తు అనుమతి లేకుండా పరీక్షలు నిర్వహించరాదని ధర్మాసనం బుధవారం స్పష్టం చేసింది. బలవంతంగా పరీక్షలు చేయటం ప్రాథమిక హక్కులకు భంగకరమని తీర్పునిచ్చింది. అయితే నిందితుడు ఒప్పుకుంటూ పరీక్షలు నిర్వహించవచ్చని సుప్రీంకోర్టు పేర్కొంది.

నార్కో అనాలసిస్‌ పరీక్షల ఫలితాలను సాక్ష్యంగా పరిగణించలేమని ధర్మాసనం అభిప్రాయపడింది. సుప్రీంకోర్టు తాజా తీర్పుతో విజయవాడ నాగవైష్ణవి హత్య కేసులో ప్రభావం చూపే అవకాశం ఉంది. ఈ కేసులో నార్కో పరీక్షలు జరిపేందుకు నిందితులను అహ్మదాబాద్‌ తీసుకువెళ్లిన విషయం తెలిసిందే.