మంత్రి కన్నా కారులో పీఅర్పీ ఎమ్మెల్యే 'శీను'

విశాఖపట్నం: గుంటూరులోనే కాకుండా మంత్రి కన్నా విశాఖ లోనూ సంచలనానికి కారణమయ్యారు. విశాఖ జిల్లా ఇన్‌ చార్జ్‌ మంత్రి కన్నా లక్ష్మీనారాయణ కోసం ఎదురు చూస్తున్న కాంగ్రెసు నాయకులు, అక్కడున్న మిగతా ప్రజలు ఒక్కసారిగా అవాక్కయ్యారు. మంత్రి కన్నా, భీమిలి పీఆర్పీ శాసనసభ్యుడు అవంతి శ్రీనివాసరావు ఒకే కారులో దిగడం విశేషం. పాడేరులో సోమవారం జరిగిన ప్రజాపథం కార్యక్రమంలో పాల్గొనడానికి మంత్రి లకీనారాయణ వెళ్తూ చోడవరం కాంగ్రెసు పార్టీ కార్యాలయంలో కొంతసేపు కార్యకర్తలతో ముచ్చటించే కార్యక్రమాన్ని ఏర్పాటు చేశారు. దీనిలో భాగంగా చోడవరం శ్రీ స్వయంభూ విఘ్నేశ్వరస్వామివారిని దర్శించుకోవడానికి మంత్రి కన్నా ఆగారు.

ముందుగా మంత్రి కారులో దిగి ఆలయంలోకి వెళ్లగా ఆ తర్వాత పీఆర్పీ ఎమ్మెల్యే శ్రీనివాసరావు కూడా ఆలయంలోకి వచ్చారు. ఇద్దరూ కలిసి విఘ్నేశ్వరస్వామివారికి పూజలు చేశారు. మీడియా ప్రతినిధులు పీఆర్పీ ఎమ్మెల్యేను కాంగ్రెసులో చేరుతున్నారా అంటూ ప్రశ్నలు వేశారు. పీఆర్పీ అధినేత చిరంజీవి జిల్లా పర్యటనలో ఉండగా కాంగ్రెసు పార్టీ మంత్రితో కలిసి పర్యటించడంపై విలేకరులు అడిగిన ప్రశ్నకు ఆయన దాటవేస్తూ పాడేరులో జరుగుతున్న మోదమాంబ ఉత్సవాలకు వెళ్తూ మంత్రి కారెక్కానని, మళ్లీ సాయంత్రం చిరంజీవి పర్యటనలో పాల్గొంటానని ఆయన బదులిచ్చారు.