తెలుగుదేశం వర్సెస్ తెలంగాణ

వరంగల్: తెలుగుదేశం పార్టీ జిల్లా కార్యాలయం వద్ద కాకతీయ యూనివర్సిటీ తెలంగాణ జేఏసీ విద్యార్థులు సోమవారం ధర్నా నిర్వహించారు. విద్యార్థి నాయకులపై ఆదివారం టీడీపీ కార్యకర్తలు దాడి చేయడాన్ని నిరసిస్తూ పార్టీ కార్యాలయంలోకి వెళ్లేందుకు యత్నించారు. సుబేదారి పోలీసులు వీరిని అడ్డుకోవడంతో తోపులాట జరిగింది. దీంతో కొద్దిసేపు ఉద్రిక్తత నెలకొంది. విద్యార్థులు టీడీపీ దిష్టిబొమ్మను కార్యాలయం మెట్ల మీద దహనం చేశారు. ఈ క్రమంలో పోలీసులతో విద్యార్థి నాయకులు వాగ్వాదానికి దిగారు. తెలుగుదేశం డౌన్‌ డౌన్‌, ఖబర్దార్‌ టీడీ పీ గుండాల్లారా ఖబర్దార్‌, జై తెలంగాణ అంటూ నినాదాలు చేశారు.

కేయూ విద్యార్థి జేఏసీ కన్వీనర్‌ వలీ ఉల్లా ఖాద్రి, నాయకుడు రాజ్‌కిషోర్‌ మాట్లాడుతూ టీడీపీ నాయకులు ప్రత్యక్ష ఉద్యమంలో ఎందుకు పాల్గొనడం లేదని ఆ పార్టీ పొలిట్‌బ్యూరో సభ్యుడు కడియం శ్రీహరి, జిల్లా కన్వీనర్‌ రేవూరి ప్రకాష్‌రెడ్డిని అడిగేందుకు వెళ్లిన విద్యార్థి నాయకులపై గూండాల్లా దాడి చేయడం అమానుషమన్నారు. ఇందుకు తెలుగుదేశం నాయకులు క్షమాపణ చెప్పాల్సిందేనన్నారు. శ్రీ కృష్ణ కమిటీకి రెండు ప్రాంతాల నుంచి రెండు నివేదికలు ఇచ్చి డ్రామాలాడుతున్నారని టీడీపీ నాయకులపై విమర్శలు గుప్పించారు.