బీహార్ లో నలుగురుని కాల్చిచంపిన మావోలు

పాట్నా: బీహార్ లో మరోసారి మావోయిస్టులు ఘాతుకానికి పాల్పడ్డారు. నలుగురు వ్యక్తులను మావోయిస్టులు కాల్చి చంపారు. మృతుల్లో ముగ్గురు ఒకే కుటుంబానికి చెందినవారు. ఈ సంఘటన బీహార్ లోని షియోహార్ జిల్లా రాంబాన్ గ్రామంలో జరిగింది. దాదాపు 200 సాయుధ నక్సలైట్లు శుక్రవారం రాత్రి పదకొండున్నర గంటల ప్రాంతంలో గ్రామానికి వచ్చారు.

గ్రామంలోకి వచ్చిన వెంటనే మావోయిస్టులు నలుగురు వ్యక్తులను కాల్చి చంపారు. కొంత మంది గ్రామస్తులు గతంలో మావోయిస్టు కార్యకర్త వీరేంద్ర షాను చంపారని, అందుకు ప్రతీకారంగానే మావోయిస్టులు ఈ ఘాతుకానికి పాల్పడ్డారని భావిస్తున్నారు. సంఘటనా స్థలంలో నక్సలైట్లు కరపత్రాలు వదిలి వెళ్లారు. సంఘటనా స్థలం చుట్టుపక్కల పోలీసులు గాలింపు చర్యలు చేపట్టారు.