కెసిఆర్ కు జగన్ భయం: సురేఖ

హైదరాబాద్: తమ పార్టీపై ప్రభావం చూపుతుందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పార్లమెంటు సభ్యుడు జగన్ యాత్రకు భయపడుతున్నారని కాంగ్రెసు శాసనసభ్యురాలు కొండా సురేఖ వ్యాఖ్యానించారు. జగన్ యాత్రను తెలంగాణతో ముడిపెట్టవద్దని ఆమె మంగళవారం తెలంగాణవాదులకు విజ్ఞప్తి చేశారు. జగన్ యాత్రను అడ్డుకోవాలని కెసిఆర్, జెఎసి కన్వీనర్ కోదండరామ్ చేసిన ప్రకటనపై ఆమె మంగళవారం మీడియా ప్రతినిధుల సమావేశంలో మండిపడ్డారు. వరంగల్ పర్యటనతో రాజకీయాలకు సంబంధం లేదని, ఇది పూర్తిగా వ్యక్తిగతమని జగన్ చెప్పినా తెరాస నాయకులు రెచ్చగొట్టడం సరి కాదని కాంగ్రెసు నాయకులు మండిపడ్డారు.

జగన్ యాత్రను అడ్డుకుంటామని ప్రకటించడంపై రాష్ట్ర మంత్రి దానం నాగేందర్ కూడా గుర్రుమన్నారు. వైయస్ కుమారుడిగా బాధిత కుటుంబాలకు పరామర్శించడం జగన్ బాధ్యత అని ఆయన అన్నారు. జగన్ యాత్రను అడ్డుకోవాలని చెబుతున్న తెలంగాణవాదులు తెలంగాణ మంత్రులు ఆంధ్రకు వెళ్లొద్దని చెబుతారా అని కాంగ్రెసు నాయకుడు గోనె ప్రకాశ్ రావు ప్రశ్నించారు. జగన్ యాత్రతో తెలంగాణ సెంటిమెంట్ మాసిపోతుందా అని పిసిసి కార్యదర్శి జనక్ ప్రసాద్ ప్రశ్నించారు. కెసిఆర్ ట్రాప్ లో పడొద్దని ఆయన కాంగ్రెసు నాయకులకు హితవు పలికారు. జగన్ యాత్రను అడ్డుకోవాలనే తెలంగాణవాదుల నిర్ణయాన్ని సీమాంధ్ర నేతలు తప్పు పట్టారు. శాసనసభ్యుడు శైలజానాథ్, పిసిసి అధికార ప్రతినిధి తులసి రెడ్డి తెలంగాణవాదుల నిర్ణయంపై మండిపడ్డారు.