తెలంగాణ యాత్రపై ఆంక్షలు తగవు: వైయస్ జగన్

హైదరాబాద్‌: తనకు సంబంధంలేని వ్యవహారాన్ని సాకుగా చూపి ఓదార్పు యాత్రపై ఆంక్షలు పెట్టడం తగదని కాంగ్రెసు కడప పార్లమెంటు సభ్యుడు వైయస్ జగన్మోహన్‌రెడ్డి అన్నారు. ప్రత్యేక రాష్ట్రం, లేదా సమైక్య రాష్ట్రం అన్నవి తన పరిధిలో లేని విషయాలని చెప్పారు. తెలంగాణ సమస్యను కేంద్ర ప్రభుత్వం పరిశీలిస్తోందని, ఈ అంశంపై శ్రీకృష్ణ కమిటీ కూడా పనిచేస్తోందని ఆయన బుధవారం ఒక ప్రకటనలో అన్నారు.

తన తండ్రి వైయస్ రాజశేఖర రెడ్డి మరణానంతరం ప్రాణాలు కోల్పోయినవారిని పరామర్శించేందుకు తాను వెళ్తున్నానని, దీన్ని రాజకీయం చేయవద్దని కోరుతున్నానని ఆయన అన్నారు. ఖమ్మం జిల్లాలో ఎక్కడా రాజకీయాలు మాట్లాడలేదని గుర్తించాలన్నారు. కార్యకర్తలు, పోలీసులు సంయమనంతో వ్యవహరించాలని కోరారు. యాత్ర జరగదని వరంగల్‌ జిల్లా బచ్చన్నపేటకు చెందిన యాదగిరి మరణించడం విషాదకరమని జగన్‌ చెప్పారు.