అట్టుడుకుతున్న తెలంగాణ, రాయలసీమ

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్మోహన్ రెడ్డి తెలంగాణ ఓదార్పు యాత్ర నేపథ్యంలో శుక్రవారం ఇటు తెలంగాణలోనూ అటు రాయలసీమలోనూ పరిస్థితి విషమించింది. ఇరు ప్రాంతాల్లోనూ ఆందోళనలు జరుగుతున్నాయి. ఆందోళనకారులు విధ్వంసాలకు దిగుతున్నారు. వరంగల్ జిల్లా మహబూబాబాద్ లో పరిస్థితి తీవ్ర ఆందోళనకరంగా ఉంది. ఆందోళనకారులు వాహనాలను, ఆర్టీసి బస్సులను దహనం చేశారు. హైదరాబాదులోని ఉస్మానియా విశ్వవిద్యాలయం విద్యార్థులు కూడా ఆందోళనకు దిగారు. గత రెండు నెలలుగా ప్రశాంతంగా ఉన్న ఒయులో ఒక్కసారిగా అగ్గిరాజుకుంది. కాల్పుల్లో ముగ్గురు మృతి చెందడంతో తెలంగాణవ్యాప్తంగా ఆగ్రహ జ్వాలలు మిన్నంటాయి. ఉస్మానియా విద్యార్థులు హైదరాబాదులోని తార్నాకాలో కాంగ్రెసు దిమ్మెలను, ఫ్లెక్సీలను ధ్వంసం చేశారు. అలాగే, ఎల్బీనగర్ లో కూడా ఆందోళనలు జరుగుతున్నాయి. కాల్పులకు నిరసనగా రేపు వరంగల్ జిల్లా బంద్ కు తెలంగాణ జెఎసి పిలుపునిచ్చింది.

వైయస్ జగన్ అరెస్టు వార్త విన్న వెంటనే రాయలసీమలోనూ ఉద్రిక్త పరిస్థితులు నెలనకొన్నాయి. జగన్ అభిమానులు తిరుపతిలో వీధుల మీదికి వచ్చి విధ్వంసానికి దిగారు. దుకాణాలను, బస్సులను ధ్వంసం చేశారు. ప్రజలపై దాడులు చేశారు. తిరుమల భక్తులను కూడా వారు వదిలిపెట్టలేదు. దీంతో పోలీసులు రంగంలోకి దిగి ఆందోళనకారులను అదుపులోకి తీసుకున్నారు. జగన్ వార్త విన్న వెంటనే ఆయన బాబాయ్, కాంగ్రెసు ఎమ్మెల్సీ కడప జిల్లా జమ్మలమడుగులో ధర్నాకు దిగారు. ఓ పెళ్లికి హాజరైన ఆయన రోడ్డుపై బైఠాయించి నిరసన తెలుపుతున్నారు. కడప మేయర్, దివంగత నేత వైయస్ బావమరిది రవీంద్రారెడ్డి జగన్ అరెస్టుపై మండిపడ్డారు. కడప బంద్ కు ఆయన పిలుపునిచ్చారు. జగన్ అరెస్టును కాంగ్రెసు పార్లమెంటు సభ్యుడు లగడపాటి రాజగోపాల్ జగన్ అరెస్టును ఖండించారు. పోలీసుల అసమర్థత వల్లనే ఈ పరిస్థితి ఏర్పడిందని ఆయన విమర్సించారు.