కాంగ్రెసుకు దాసరి నారాయణరావు దూరం, చిరంజీవి చేరువ?

హైదరాబాద్: కాంగ్రెసు పార్టీకి ప్రముఖ దర్సక నిర్మాత, మాజీ కేంద్ర మంత్రి దాసరి నారాయణ రావు దూరమవుతున్న నేపథ్యంలో ప్రజారాజ్యం పార్టీ అధ్యక్షుడు చిరంజీవి చేరువ అవుతున్నారు. చిరంజీవి ప్రజారాజ్యం పార్టీ పెట్టిన నేపథ్యంలో దాసరి నారాయణ రావు ప్రాముఖ్యం కాంగ్రెసు పార్టీలో తగ్గుతూ వచ్చింది. కేంద్ర మంత్రి పదవి నుంచి కూడా తప్పుకోవాల్సి వచ్చింది. కాపు సామాజిక వర్గాన్ని తన వైపు పూర్తిగా కట్టి పడేసే ఉద్దేశంతో దాసరి నారాయణరావును అప్పట్లో కాంగ్రెసు పార్టీ దాసరి నారాయణ రావును చేరదీసినట్లు భావిస్తారు. అయితే, చిరంజీవికి కాపు సామాజిక వర్గంలో అత్యంత ఆదరణ ఉంది. చిరంజీవి పార్టీ పెట్టడాన్ని దాసరి నారాయణ రావు నివారించలేకపోయారనే అసంతృప్తి కాంగ్రెసు పెద్దలకు ఉన్నట్లు చెబుతారు.

తాము చిరంజీవి ప్రజారాజ్యం పార్టీకి ఓటేస్తే గత ఎన్నికల్లో తెలుగుదేశం పార్టీ విజయం సాధిస్తుందనే అనుమానంతో దాన్ని నివారించడానికి కాంగ్రెసు పార్టీకి కాపు సామాజిక వర్గం కాంగ్రెసు పార్టీకి ఓటేసేందని, దాని వల్లనే ప్రజారాజ్యం దెబ్బ తిని కాంగ్రెసు గెలిచిందనే భావన ఉంది. ఈ స్థితిలో చిరంజీవిని తమ వైపు లాక్కోవడం ద్వారా కోస్తాంధ్రలో కాపు సామాజిక వర్గం మద్దతు అప్రయత్నంగానే తమ వైపు ఉంటుందని కాంగ్రెసు అధ్యక్షురాలు సోనియా గాంధీకి సమాచారం అందినట్లు సమాచారం. అందువల్లనే చిరంజీవితో చేతులు కలపడానికి ఆమె సిద్ధపడినట్లు చెబుతున్నారు.

కాగా, రాజకీయాలతో విసిగిపోయిన దాసరి నారాయణ రావు సినిమాలతో బిజీగా ఉన్నారు. అయితే, తాను తీసిన యంగ్ ఇండియాపై పెట్టుకున్న ఆశలు దాసరికి పూర్తి నిరాశనే మిగిల్చినట్లు భావిస్తున్నారు. తెలుగుదేశం పార్టీకి చెందిన బాలకృష్ణతో దాసరి నారాయణ రావు తన 150వ చిత్రాన్ని నిర్మించాలని భావించడం కూడా కాంగ్రెసు పెద్దలకు నచ్చడం లేదని అంటున్నారు. ఏమైనా దాసరి నారాయణ రావు దూరమవుతున్న స్థితిలో కాంగ్రెసు పార్టీ చిరంజీవితో స్నేహం నెరపడానికి సిద్ధపడింది.