ఉప ఎన్నికల కోసం చేతులు కలిపిన టిఆర్ఎస్, బిజెపి

హైదరాబాద్‌: తెలంగాణ ఉప ఎన్నికల ఘట్టంలో ముఖ్యమైన సన్నివేశమిది. ఉపఎన్నికల్లో పరస్పరం సహకరించుకుంటూ ముందుకు సాగాలని టిఆర్ఎస్, బిజెపి నిర్ణయించాయి. తెరాస అధినేత కేసీఆర్‌, భాజపా రాష్ట్ర అధ్యక్షుడు కిషన్‌రెడ్డికి ఫోన్‌ చేశారు. ఉపఎన్నికల్లో అనుసరించాల్సిన వ్యూహంపై ఇద్దరూ చాలాసేపు చర్చించారు. తెలంగాణ రాష్ట్ర సాధనే లక్ష్యంగా ఇరుపార్టీలు ముందుకెళుతున్న నేపథ్యంలో సహకారంతో సమన్వయంతో కలిసి పని చేయాలని తద్వారా గెలుపు మరింత సులువవుతుందన్న నిర్ణయానికొచ్చారు.

భాజపా అభ్యర్థి లక్ష్మీనారాయణ పోటీ చేస్తున్న నిజామాబాద్‌లో తమ పార్టీ మద్దతు పూర్తిగా ఉంటుందని, తాను స్వయంగా అక్కడ రోడ్‌షోలు నిర్వహించి ప్రచారం చేస్తానని కేసీఆర్‌ చెప్పారు. భాజపా జాతీయ నేతల్ని రప్పించి నిజామాబాద్‌ సహా ఉప ఎన్నికలు జరిగే అన్ని నియోజకవర్గాల్లో ప్రచారం జరిపించాలని ప్రతిపాదించినట్టు సమాచారం. దీనికి కిషన్‌రెడ్డి సానుకూలంగానే స్పందించినట్లు తెలిసింది. ఇరుపార్టీల నేతలతో సమన్వయ కమిటీని కూడా ఏర్పాటు చేయాలని నిర్ణయించినట్లు తెలుస్తోంది.