తెలంగాణ ఉప ఎన్నికలతో లాభం లేదు: నారాయణ

విజయవాడ : తెలంగాణలో జరుగుతున్న ఉప ఎన్నికలతో ప్రయోజనం శూన్యమని సిపిఐ రాష్ట్ర కార్యదర్శి కె. నారాయణ అభిప్రాయపడ్డారు. ఉప ఎన్నికల్లో మిశ్రమ ఫలితాలు వస్తాయని ఆయన అన్నారు. తాము ఉప ఎన్నికల్లో పోటీ చేయడం లేదని ఆయన చెప్పారు. పెట్రో ధరల పెంపుపై విజయవాడ లెనిన్ సెంటర్ లో జరిగిన ఆందోళన కార్యక్రమంలో ఆయన శనివారం పాల్గొన్నారు. ఈ సందర్భంగా నారాయణ స్వల్పంగా గాయపడ్డారు. కార్యకర్తలు కేంద్ర ప్రభుత్వ దిష్టిబొమ్మను దగ్ధం చేశారు. ఈ సమయంలో నిప్పు రవ్వలు నారాయణ కాలిపై పడ్డాయి. దాంతో గాయపడిన ఆయనకు ప్రాథమిక చికిత్స అందించారు.

పెట్రోల్, డీజిల్ లపై నియంత్రణ ఎత్తేయడం సరి కాదని ఆయన అన్నారు. పెంచిన పెట్రో ధరలకు నిరసనగా ఈ నెల 28వ తేదీన రాష్ట్రవ్యాప్తంగా వామపక్షాల ఆధ్వర్యంలో ధర్నాలు చేపట్టనున్నట్లు ఆయన తెలిపారు. పోలవరం జోలికి వస్తే ప్రజలు సహించబోరని ఆయన హెచ్చరించారు. రాజకీయ లబ్ధి కోసమే పోలవరంపై వివాదం సృష్టిస్తున్నారని ఆయన విమర్శించారు.