75 వేల కోట్ల పెట్టుబడుల లక్ష్యంగా పారిశ్రామిక విధానం: సిఎం

హైదరాబాద్‌: నూతన పారిశ్రామిక విధానం ద్వారా 15 శాతం వృద్ధిరేటు సాధించేందుకు యత్నిస్తున్నామని ముఖ్యమంత్రి రోశయ్య తెలిపారు. 2010-15 పారిశ్రామిక విధానాన్ని ఆయన గురువారం సచివాయలయంలో విడుదల చేశారు. రానున్న అయిదేళ్లలో 75 వేలకోట్ల రూపాయల పెట్టుబడులే లక్ష్యంగా నూతన విధానం రూపొందించామని ఆయన చెప్పారు. ఏడాదికి 15 వేల కోట్ల పెట్టుబడులతో ఆ లక్ష్యాన్ని సాధించాలనేది తమ ఉద్దేశ్యమని ఆయన చెప్పారు.

పారిశ్రామికాభివృద్ధిలో భాగంగా నిర్దేశించుకున్న లక్ష్యాలను చేరుకుంటామని ఆయన ఆశాభావం వ్యక్తం చేశారు. పారిశ్రామికాభివృద్ధి ద్వారానే రాష్ట్ర అభివృద్ధి చెందుతుందని ఆయన అన్నారు. ఈ కార్యక్రమంలో భారీ పరిశ్రమలశాఖ మంత్రి కన్నా లక్ష్మీనారాయణ, చిన్న పరిశ్రమల శాఖ మంత్రి డి.కె.అరుణ. ఐటీ శాఖ మంత్రి కోమటిరెడ్డి వెంకటరెడ్డి, ఆర్‌ ఆండ్‌ బీ మంత్రి గల్లా అరుణకుమారి, చిన్న నీటిపారుదల శాఖ మంత్రి సునీతా లక్ష్మారెడ్డి తదితరులు పాల్గొన్నారు.