షోకాజ్ నోటీసుపై అంబటి రాంబాబు గరం గరం

హైదరాబాద్: తనకు ప్రదేశ్ కాంగ్రెసు కమిటీ (పిసిసి) క్రమశిక్షణా సంఘం ఇచ్చిన నోటీసుపై పార్టీ ప్రధాన కార్యదర్శి అంబటి రాంబాబు తీవ్రంగా మండిపడ్డారు. ముఖ్యమంత్రి కె. రోశయ్యపై చేసిన వ్యాఖ్యలకు గాను ఆయనకు పిసిసి క్రమశిక్షణా సంఘం నోటీసు ఇచ్చింది. దానిపై వివరణ ఇవ్వడానికి ఆయన సోమవారం క్రమశిక్షణా సంఘం ముందు హాజరయ్యారు. అనంతరం ఆయన మీడియా ప్రతినిధులతో మాట్లాడారు. పిసిసి తీరుపై ఆయన తీవ్రంగా మండిపడ్డారు. తనకు ఆఘమేఘాల మీద నోటీసు ఇవ్వడంలోని ఆంతర్యమేమిటని ఆయన అడిగారు. ఇందులో కుట్ర ఉందో, లేదో మీరే ఆలోచించాలని ఆయన మీడియా ప్రతినిధులతో అన్నారు.

ముఖ్యమంత్రిగా ఉన్న కాలంలో వైయస్ రాజశేఖర రెడ్డిపై విమర్శలు చేసినవారి మీద, కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ ఎవడని అడిగినవారిపై చర్యలు తీసుకోలేదని, తనపైనే చర్యలు తీసుకోవడాన్ని అర్థం చేసుకోవచ్చునని ఆయన అన్నారు. తెలంగాణలోని 12 స్థానాలకు పోటీ చేయాలనే పార్టీ అధిష్టానం నిర్ణయాన్ని వ్యతిరేకించినవారిపై కూడా చర్యలు తీసుకోలేదని ఆయన అన్నారు. పిసిసి నిబంధనావళికి విరుద్ధంగా తనకు షోకాజ్ నోటీసు ఇచ్చారని ఆయన విమర్శించారు. వివరణ ఇవ్వడానికి పది రోజుల గడువు కోరానని, ఈ నెల 31 వరకు పిసిసి క్రమశిక్షణా సంఘం తనకు గడువు ఇచ్చిందని ఆయన అన్నారు.