నల్ల జాతీయుల చేతిలో అమెరికాలో హైదరాబాద్ విద్యార్థి దారుణ హత్య

వాషింగ్టన్‌: అమెరికాలోని కనెక్టికట్‌లో ఉన్న స్ట్రాఫోర్డ్‌ విశ్వవిద్యాలయంలో ఎంఎస్‌ చదువుతున్న అరుణ్‌ కుమార్‌ నరోటే అనే హైదరాబాద్‌ విద్యార్థి దుండగుల చేతిలో దారుణ హత్యకు గురయ్యాడు. అరుణ్‌ కుమార్‌ బ్రిడ్జిపోర్ట్‌లోని ఓ దుకాణంలో పార్ట్‌టైం ఉద్యోగం చేస్తున్నాడు. స్థానిక కాలమానం ప్రకారం.. సోమవారం రాత్రి ఆయన విధుల్లో ఉండగా నల్లజాతీయులైన దుండగులు వచ్చి దోపిడీకి యత్నించారు. వారిని అడ్డుకోవడానికి ప్రయత్నించగా కాల్పులు జరిపి పారిపోయారు. తీవ్ర గాయాలపాలైన అరుణ్‌ కుమార్‌ అక్కడికక్కడే మృతి చెందారు. అరుణ్‌ హైదరాబాద్‌ శివార్లలోని ఇంద్రారెడ్డి మెమోరియల్‌ కళాశాలలో ఇంజినీరింగ్‌ చదివారు. అతడి కుటుంబంకార్వాన్‌లో నివాసముంటోంది.

అరుణ్ మృతదేహాన్ని సాధ్యమైనంత త్వరగా హైదరాబాద్‌కు పంపాలని తానా ఎగ్జిక్యూటివ్ ప్రెసిడెంట్ తోటకూర ప్రసాద్‌ను కోరారు. ఈ సంఘటనపై ప్రసాద్ తీవ్ర దిగ్భాంతి వ్యక్తం చేశారు. ఉన్నత చదువుల కోసం అమెరికాకు వచ్చిన భారతీయులు ఖర్చులు భరించేందుకు ఇలాంటి ఉద్యోగాలు చేయాల్సి వస్తోందని, వారు ఆర్థిక పరమైన ఒత్తిడి ఎదుర్కొంటున్నారని, అయినప్పటికీ, ఇలాంటి చోట్ల పని చేయడమంటే ప్రాణాలు పణంగా పెట్టడమేనని ప్రసాద్ ఆవేదన వ్యక్తం చేశారు. అరుణ్ మృతదేహాన్ని త్వరగా హైదరాబాద్‌కు పంపేందుకు వీలుగా ఆయన కేంబ్రిడ్జి పోలీసులతో, భారత దౌత్య వర్గాలలో చర్చిస్తున్నారు.