అనివార్యమైన స్థితిలోనే సోంపేటలో కాల్పులు: సబితా ఇంద్రారెడ్డి

హైదరాబాద్: శ్రీకాకుళం జిల్లా సోంపేటలో అనివార్యమైన స్థితిలోనే కాల్పులు జరిపారని రాష్ట్ర హోం మంత్రి సబితా ఇంద్రారెడ్డి చెప్పారు. సోంపేట ఘటనపై ఆమె గురువారం శాసనసభలో ఓ ప్రకటన చేశారు. పోలీసులు మైక్ ల్లో హెచ్చరికలు చేశారని, లాఠీ చార్జీ చేశారని, బాష్పవాయువు ప్రయోగించారని, అయినా పరిస్థితి అదుపులోకి రాలేదని, దీంతో తప్పనిసరి పరిస్థితిలోనే కాల్పులు జరిపారని ఆమె వివరించారు. సోంపేట థర్మల్ పవర్ స్టేషన్ నిర్మాణ స్థలానికి ఆందోళనకారులు కర్రలు, రాళ్లతో వచ్చారని, పోలీసులపై దాడులు చేశారని, రెండు పోలీసు వాహనాలకు నిప్పు పెట్టారని, పలు వాహనాలను ధ్వంసం చేశారని ఆమె చెప్పారు.

సోంపేట ఘటనలో 86 మంది పౌరులు, 37 మంది పోలీసులు, ఆరుగురు జర్నలిస్టులు గాయపడినట్లు, వారు సోంపేట ఆస్పత్రిలో చికిత్స పొందుతున్నట్లు ఆమె తెలిపారు. ప్రస్తుతం పరిస్థితి అదుపులోనే ఉందని, పోలీసు ఉన్నతాధికారులు సంఘటనా స్థలంలో పరిస్థితిని పర్యవేక్షిస్తున్నారని ఆమె అన్నారు. కాల్పుల్లో ఇద్దరు మరణించినట్లు ఆమె తెలిపారు. ఒకరు లక్కవరం గ్రామానికి చెందిన కృష్ణమూర్తి కాగా, రెండో వ్యక్తి పలాసపురానికి చెందిన జోగాపురం అని ఆమె చెప్పారు. సంఘటన జరగడం ప్రభుత్వానికి కూడా బాధగానే ఉందని ఆమె చెప్పారు.