వైయస్ జగన్ ఓదార్పు యాత్ర: రంగంలోకి దిగిన రాహుల్

న్యూఢిల్లీ: తమ పార్టీ కడప పార్లమెంటు సభ్యుడు వైయస్ జగన్ ఓదార్పు యాత్రపై కాంగ్రెసు నేత, పార్లమెంటు సభ్యుడు రాహుల్ గాంధీ రంగంలోకి దిగారు. జగన్ వర్గానికి చెందిన యువ శాసనసభ్యులను ఢిల్లీకి పిలిపించుకుని మాట్లాడుతున్నారు. జగన్ ఓదార్పు యాత్రపై, యువ శాసనసభ్యులు తమ తమ నియోజక వర్గాల్లో చేపడుతున్న కార్యక్రమాలపై ఆయన అడిగి తెలుసుకుంటున్నారు. కొత్తగా గెలిచి, ప్రస్తుతం జగన్ కు మద్దతిస్తున్న యువ శాసనసభ్యులు చాలా మందికి కాంగ్రెసు సంస్థాగత వ్యవహారాలు తెలియవు. వారంతా కనీసం యూత్ కాంగ్రెసులో కూడా పని చేసినవారు కారు. వారందరికీ దివంగత నేత వైయస్ రాజశేఖర రెడ్డి ఎన్నికల్లో టికెట్లు ఇప్పించుకుని గెలిపించుకున్నారు. ఈ రీత్యా కూడా రాహుల్ గాంధీ వారితో మాట్లాడాలని నిర్ణయించుకున్నట్లు సమాచారం.

ఇటీవల నరసాపురం ఎమ్మెల్యే ప్రసాదరాజు, బొబ్బిలి ఎమ్మెల్యే రంగారావు, చింతలపూడి ఎమ్మెల్యే రాజేష్‌లను మూడు రోజుల కిందట ఢిల్లీ పిలిపించుకుని రాహుల్‌ మాట్లాడారు. నేరుగా రాహుల్‌గాంధీ సహాయకుడు వీరికి ఫోన్‌ చేసి రమ్మని చెప్పడంతో ఈ ఎమ్మెల్యేలు ఢిల్లీకి వెళ్లినట్లు తెలిసింది. ''రాష్ట్రంలో ఎలాంటి అభివృద్ధి కార్యక్రమాలు జరుగుతున్నాయి?, ఇవి సరిపోతాయా? కొత్త కార్యక్రమాల అవసరం ఉందా?'' అంటూ రాహుల్‌ ఎమ్మెల్యేలను అడిగి తెలుసుకున్నట్లు సమాచారం. వరుసగా అటువంటి శాసనసభ్యులను పిలిపించుకుని రాహుల్ గాంధీ మాట్లాడుతున్నట్లు సమాచారం.