తెలంగాణ ఉప ఎన్నికల్లో ఢిల్లీ కాంగ్రెసు చేతివాటం

న్యూఢిల్లీ: తెలంగాణలోని 12 శాసనసభా నియోజకవర్గాలకు జరుగుతున్న ఉప ఎన్నికల్లో పరువు కాపాడుకునేందుకు కాంగ్రెసు అధిష్టానం స్వయంగా రంగంలోకి దిగినట్లు వార్తలు వస్తున్నాయి. ఉప ఎన్నికల్లో మూడు నాలుగు స్థానాలనైనా గెలుచుకోలేకపోతే పార్టీ భవిష్యత్తు ప్రమాదంలో పడుతుందని పార్టీ అధిష్టానం భావిస్తున్నట్లు సమాచారం. దీంతో అధిష్టానం స్వయంగా రంగంలోకి దిగి గెలుపు వ్యూహాన్ని రచిస్తోంది. ఎప్పటికప్పుడు నిఘా సంస్థల ద్వారా సమాచారాన్ని తెప్పించుకుంటుంది. దానికి తోడు, ఓ ప్రైవేట్ సంస్థ ద్వారా కూడా సమాచారాన్ని తెప్పించుకుంటున్నట్లు తెలుస్తోంది. కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ ఎప్పటికప్పుడు రాష్ట్రనేతలతో మాట్లాడుతూ తగిన సహాయ సహకారాలు అందిస్తున్నారు.

గెలవడానికి అవకాశం ఉందని భావిస్తున్న నిజామాబాద్ అర్బన్, ధర్మపురి, సిరిసిల్ల, సిర్పూర్ కాగజ్ నగర్, వేములవాడలపై కాంగ్రెసు అధిష్టానం ప్రత్యేక దృష్టిని కేంద్రీకరించింది. ఎన్నికల ప్రచార బాధ్యతను మంత్రులపై, సీనియర్ నేతలపై పెట్టింది. దీంతో రాష్ట్ర మంత్రులు తమకు అప్పగించిన నియోజకవర్గాల్లో పర్యటిస్తున్నారు. సీనియర్ నేత వి. హనుమంతరావు ఎన్నికల ప్రచారం నిర్వహిస్తున్నారు. మరో సీనియర్ నాయకుడు కె. కేశవరావు కూడా ఒకటి రెండు నియోజకవర్గాల్లో ప్రచారం నిర్వహించే అవకాశం ఉందని భావిస్తున్నారు. సిడబ్ల్యుసి సభ్యుడు వెంకటస్వామి తన కుమారుడు పోటీ చేస్తున్న చెన్నూరు నియోజకవర్గంపై దృష్టి పెట్టారు.

తెలంగాణ సెంటిమెంటు ప్రధాన ఎజెండాగా జరుగుతున్న ఉప ఎన్నికల్లో నిజామాబాద్ అర్బన్ నుంచి విజయం సాధించడానికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ చెమటోడుస్తున్నారు. తామే తెలంగాణ తెస్తామంటూ హామీ ఇస్తున్నారు. తెలంగాణ రావడం ఖాయమని, తెలంగాణ ఇస్తామని సోనియా చెప్పారని ఆయన అంటున్నారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో మాటల యుద్ధానికి దిగుతున్నారు.