చంద్రబాబుపై పురంధేశ్వరి వ్యాఖ్యలు సరి కావు: దేవినేని ఉమ

విజయవాడ: బాబ్లీపై పోరాటం చేస్తున్న చంద్రబాబుపై రాష్ట్ర మంత్రులు అనుచిత వ్యాఖ్యలు చేయడాన్ని తెలుగుదేశం పార్టీ తీవ్రంగా ఖండించింది. తమ పదవులు కాపాడుకునేందుకే మంత్రులు అర్ధరహిత వ్యాఖ్యలు చేస్తున్నారని తెలుగుదేశ పార్టీ కృష్ణాజిల్లా అధ్యక్షుడు, శాసనసభ్యుడు దేవినేని ఉమా విజయవాడలో విమర్శించారు. కేంద్ర మంత్రి పురంధేశ్వరి చంద్రబాబు పట్ల చేసిన వ్యాఖ్యలను ఆయన శుక్రవారం మీడియా ప్రతినిధుల సమావేశంలో తీవ్రంగా ఖండించారు.

చేతనైతే మహారాష్ట్ర, కర్ణాటకలు నిర్మిస్తున్న అక్రమ ప్రాజెక్టులను అడ్డుకోవాలని అన్నారు. కృష్ణా, గోదావరి నదులపై అక్రమ ప్రాజెక్టులను అడ్డుకునేందుకు పార్టీ మరో పోరాటానికి సిద్ధమవుతున్నట్లు చెప్పారు. మహారాష్ట్ర పోలీసులు తమ పట్ల నీచంగా వ్యవహారించారని, ప్రజల నుంచి ఒత్తిడి రాకపోతే తమపై కాల్పులకైనా తెగబడేవారన్నారు. రాష్ట్ర ప్రయోజనాలు కాపాడేందుకు ప్రాణత్యాగానికైనా వెనకాడబోమని ఉమా స్పష్టం చేశారు.