ఫలితాలపై మొయిలీ తెలంగాణ ఎంపిల వద్ద అసంతృప్తి..

న్యూఢిల్లీ : తెలంగాణ ఉప ఎన్నికల ఫలితాలపై కాంగ్రెసు రాష్ట్ర వ్యవహారాల ఇంచార్జీ వీరప్ప మొయిలీ తీవ్ర అసంతృప్తి వ్యక్తం చేశారని సమాచారం. తెలంగాణకు చెందిన కొంత మంది కాంగ్రెసు పార్లమెంటు సభ్యులు శుక్రవారం మొయిలీని కలిశారు. ఈ సమయంలో వారిపై మొయిలీ అసహనం వ్యక్తం చేసినట్లు తెలుస్తోంది. ఎన్నికల్లో సరిగా పని చేయలేదని ఆయన అభిప్రాయపడినట్లు తెలుస్తోంది. మంత్రులు గానీ, పార్లమెంటు సభ్యులు గానీ ఎన్నికల్లో సరిగా పని చేయలేదని అన్నట్లు సమాచారం.

కాగా, ఉప ఎన్నికల ఫలితాలపై కాంగ్రెసు అధ్యక్షురాలు సోనియా గాంధీ కూడా తీవ్ర అసంతృప్తితో ఉన్నట్లు సమాచారం. తెలంగాణ సెంటిమెంటు బలంగా ఉందని, అందువల్లనే తెలంగాణ రాష్ట్ర సమితి గెలిచిందని పార్టీ ఎంపిలు మొయిలీకి చెప్పినట్లు సమాచరాం. అంతేకాకుండా, తెలంగాణ రాష్ట్ర ఏర్పాటు కోసం త్యాగం చేశారనే అబిప్రాయం ప్రజల్లో బలంగా ఉందని, దాని వల్ల కూడా ప్రజలు రాజీనామా చేసినవారిని గెలిపించారని వారు వివరించినట్లు చెబుతున్నారు.