వైయస్ జగన్ ను దూరం పెట్టిన కాంగ్రెసు సీమాంధ్ర ఎంపీలు

న్యూఢిల్లీ: తమ సహచరుడు వైయస్ జగన్ అంటే కాంగ్రెసు పార్లమెంటు సభ్యులు భయపడుతున్నట్లే ఉంది. పార్లమెంటు సభ్యుడు కావూరి సాంబశివ రావు నివాసంలో మంగళవారం రాత్రి జరిగిన విందు సమావేశానికి వైయస్ జగన్ కు ఆహ్వానం వెళ్లలేదు. పార్టీ అధిష్టానం జగన్ పై ఆగ్రహంగా ఉండడం వల్లనే జగన్ ను ఆహ్వానించలేదని తెలుస్తోంది. సమైక్యాంధ్రపై శ్రీకృష్ణ కమిటీకి నివేదిక ఇచ్చే విషయంపై సీమాంధ్ర పార్లమెంటు సభ్యులు సమావేశమయ్యారు. సమైక్య నినాదాన్ని పార్లమెంటులో గట్టిగా వినిపించిన జగన్ కు ఆహ్వానం అందకపోవడం విచిత్రమే అయినప్పటికీ అధిష్టానం నుంచి ఇబ్బందులు ఎదుర్కోవడానికి ఎవరూ సిద్ధంగా లేరని తెలుస్తోంది.

కాగా, ముఖ్యమంత్రి రోశయ్యపై తీవ్ర వ్యాఖ్యలు చేసిన జగన్ వర్గానికి చెందిన శాసనసభ్యురాలు కొండా సురేఖపై కాంగ్రెసు సీమాంధ్ర పార్లమెంటు సభ్యుడు రాయపాటి సాంబశివరావు తీవ్రంగా మండిపడ్డారు. ముఖ్యమంత్రి రోశయ్యను వెనకేసుకొచ్చారు. రోశయ్యను మించిన బలమైన నాయకుడు లేడని ఆయన అన్నారు. సురేఖకు అధికారం అప్పగించాలా అని ఆయన ప్రశ్నించారు. సీమాంధ్ర ఎంపిల సమావేశానికి దివంగత నేత వైయస్ ప్రియ మిత్రుడు కెవిపి రామచందర్ రావు కూడా హాజరు కాలేదు. ఆయనకు ఆహ్వానం అందిందా, లేదా అనేది తెలియదు. జగన్ పార్టీలో ఉంటేనే మంచిదని, జగన్ అధిష్టానం మాట వింటే బాగుంటుందని సమావేశంలో ఓ అభిప్రాయం వ్యక్తమైనట్లు తెలుస్తోంది.