కొండా సురేఖకు షోకాజ్ నోటీసు జారీ

హైదరాబాద్: ముఖ్యమంత్రి కె. రోశయ్యపై తీవ్ర వ్యాఖ్యలు చేసిన శాసనసభ్యురాలు కొండా సురేఖకు కాంగ్రెసు క్రమశిక్షణా సంఘం షోకాజ్ నోటీసు జారీ చేసింది. ధిక్కారానికి పాల్పడిన 24 గంటల లోపే ఆమెకు షోకాజ్ నోటీసు జారీ కావడం విశేషం.పార్టీ వ్యవహారాలపై అధ్యక్షురాలికి లేఖ రాయడం తప్పుకాకున్నా, ఆ లేఖను బహిరంగంగా విడుదల చేయడాన్ని పార్టీ తీవ్రంగా తీసుకుంది. పీసీసీ అధ్యక్షుడు డి.శ్రీనివాస్‌ బుధవారం ఢిల్లీలో పార్టీ రాష్ట్ర వ్యవహారాల ఇన్‌ఛార్జి వీరప్ప మొయిలీతో సమావేశమయ్యారు. ఆ సందర్భంగా ముఖ్యమంత్రి రోశయ్య కూడా మొయిలీతో మాట్లాడినట్లు సమాచారం. ఆపై అధిష్ఠానం ఆదేశాల మేరకు పీసీసీ క్రమశిక్షణ సంఘం అధ్యక్షులు కంతేటి సత్యనారాయణ రాజు నోటీసును జారీ చేశారు. వారం రోజుల్లో ఆమె వివరణ ఇవ్వాలని అందులో కోరారు. ఆమె వివరణ సంతృప్తికరంగా లేకుంటే సస్పెండ్‌ చేయడం ఖాయమని పార్టీ వర్గాలంటున్నాయి. అయితే వివరణతో నిమిత్తం లేకుండానే రెండు, మూడు రోజుల్లో ఏకంగా సస్పెండ్‌ చేస్తారని కొందరు పార్టీ నేతలు అభిప్రాయపడుతున్నారు. అంబటి రాంబాబు విషయంలో ఇదే జరిగింది.

తొలుత పీసీసీ క్రమశిక్షణ సంఘం పార్టీ నియమావళి ప్రకారం షోకాజ్‌ నోటీసు ఇచ్చింది. ఆ తరువాత రాంబాబు సమాధానం ఇచ్చేలోగానే అధిష్ఠానం నేరుగా సస్పెండ్‌ చేసింది. అదే రీతిలో తక్షణ స్పందనగా షోకాజ్‌ ఇచ్చినా సురేఖపై వేటు తప్పదని పార్టీ వర్గాలంటున్నాయి. పార్టీలో క్రమశిక్షణను ఉల్లంఘిస్తే ఎంతటి పరిణామాలనైనా ఎదుర్కొనేందుకు సిద్ధంగా ఉన్నామని అధిష్ఠానం స్పష్టమైన సంకేతాలు పంపుతోంది. ఇప్పటికే సోనియాగాంధీ జగన్‌ వ్యవహారంలో అమీతుమీ తేల్చుకునేందుకు సిద్ధమయ్యారు. ఆమె రాష్ట్ర పార్టీ పరిస్థితులపై పూర్తిస్థాయిలో చర్చించి మరిన్ని కఠిన నిర్ణయాలు తీసుకుంటారని చెబుతున్నారు. అయితే సురేఖ ఎమ్మెల్యే కావడం వల్ల అధిష్ఠానం తొందర పడదనీ, నిబంధనలకు అనుగుణంగానే నడుచుకుంటుందని కొందరు పార్టీ నేతలు అభిప్రాయ పడుతున్నారు.