కుసుమ కుమారికి హైకోర్టులో తాత్కాలిక ఊరట

హైదరాబాద్: ఉద్వాసనకు గురైన శ్రీకృష్ణ దేవరాయల విశ్వవిద్యాలయం (ఎస్కెయు) వైస్ చాన్సలర్ కుసుమ కుమారికి హైకోర్టులో తాత్కాలిక ఊరట లభించింది. కుసుమ కుమారిని విసి పదవిలో కొనసాగించాలని హైకోర్టు బుధవారం తాత్కాలిక ఉత్తర్వులు జారీ చేసింది. అయితే, ఆమె విధులకు దూరంగా ఉండాలని ఆదేశించింది. వివరణ ఇచ్చుకునేందుకు కుసుమ కుమారికి హైకోర్టు నెల రోజుల గడువు ఇచ్చింది.

కుసుమ కుమారిని విసి పదవి నుంచి తొలగిస్తూ గవర్నర్ నరసింహన్ ఉత్తర్వులు జారీ చేశారు. ఈ ఉత్తర్వులను కుసుమ కుమారి హైకోర్టులో సవాల్ చేశారు. తన హయాంలో జరిగాయని చెబుతున్న అక్రమాలపై విచారణకు వేసిన కమిటీ తన వివరణ కూడా తీసుకోలేదని, కనీస నిబంధనలు పాటించకుండా తనను పదవి నుంచి తొలగించారని ఆమె హైకోర్టుకు ఫిర్యాదు చేశారు. తాను జగన్ మనిషిని కాబట్టే తనను తొలగించారని కూడా ఆమె ఆరోపించారు.